Qazağın işğal altında olan 7 kəndinin aqibəti məsələsi hələ də gündəmdə qalmaqdadır. Hazırda sülh sənədində də mübahisəli mövzulardan hesab edilən bu məqamın necə həll ediləcəyi vaxtaşırı müzakirə edilir. Maraqlıdır, Qazağın 7 kəndi ilə bağlı Bakının strateji addımları necə olacaq? Hərbi əməliyyat variantı hələ də aktualdır, yoxsa diplomatik kanallarla problem həll oluna bilər?
Mövzu ilə bağlı Ednews-a açıqlamasında politoloq Natiq Miri bildirdi ki, beynəlxalq səviyyədə Azərbaycana qarşı baş verən siyasi hücum əməliyyatlarının arxasında dayanan məhz bu məsələlərdir:
“Bu cür təzyiqlərlə müxtəlif avropa strukturlarında anti-Azərbaycan qərarları, ABŞ-da sanksiya tələbələri kimi, eyni zamanda Fransa senatının qəbul etdiyi sanksiya tələbələri bütün bunların hamısı çəkindirici məqam xarakteri daşıyır ki, Azərbaycan Ermənistanın təklif etdiyi ərazi bütövlüyünün qarşılıqlı tanınması və sərhədlərin müəyyənləşməsini konkret xəritələr əsasında həllini tapsın. Ancaq düşünürəm ki, Azərbaycan öz halal torpaqlarından vazkeçəcək deyil. İndiki vəziyyətdə Azərbaycanın hərbi əməliyyatlar keçirməsi planlaşdırılmır. Çünki bu daha böyük bir qarışıdurma vəd edir. Hər bir halda bu məsələ danışıq predmetidir. Ermənistan əgər 70 və 91-ci il xəritələrini əsas gətirirsə Azərbaycanın da qarşı iddiaları mövcuddur. Ermənistan bu xəritələri dilə gətirməklə dolayısı ilə Sovet xəritələrinə etimad etdiyini göstərir”.
N.Miri söhbət əsnasında qeyd etdi ki, bu məsələ hüquq çərçivəsində, məntiqlə davam etməlidir:
“Yalnız bundan sonra müəyyən anlaşmaları ortaya çıxarmaq mümkündür. Belə olduğu təqdirdə Ermənistan da prinsipial mövqeyindən geri çəkiləcək. Ancaq Ermənistan hələlik havadar dövlətlərin təzyiqləri fonunda istədiklərinə nail olmaq istəyir. Bu da onlara heç bir perespektiv vəd etmir. Ona görə yeganə yol danışıqlardır. Qazağın 7 kəndi məsələsində ən mühüm kənd Yuxarı Əksiparadır. Bu kəndi bir neçə saatlıq əməliyyat çərçivəsində Azərbaycana qaytarıla bilər. Bu elə böyük bir zəhmət tələb etməyən hərbi əməliyyat olacaq. Yuxarı Əskiparanı qaytararıqsa artıq bu planın demək olar üstündən xətt çəkiləcək. Çünki bu kənd Azərbaycan ordusunun nəzarətində olduqda Ermənistanın Gürcüstana çıxışı bağlanacaq”.
Oğuz
