Fevralın 7-də ölkədə keçirilən növbədənkənar prezident seçkilərinə dünya mediası fərqli mövqelərlə yanaşıb. ABŞ vətəndaşları və media agentlikləri Azərbaycanda keçirilən prezident seçkisinə necə reaksiya verib?
Məsələ ilə bağlı Ednews-a danışan ABŞ-ın Azərbaycandakı keçmiş səfiri Metyu Brayza 2024 prezident seçkisində əhalinin fəal şəkildə iştirakının dünyada yüksək şəkildə qiymətləndirildiyini bildirib.
“Azərbaycanda İlham Əliyev ən populyar siyasi liderdir. Ərazilərin geri alınması, siyasi-iqtisadi stabillik və hərbi inkişaf məhz Əliyevin hakimiyyəti dövründə baş vermiş hadisələrdir. Bu onun nüfuzunu artıran faktorlardandır. Prezident seçkisində əhalinin təxminən 76%-i iştirak edib ki, bu əslində olduqca yaxşı göstəricidir. Əslində ölkədə ilk dəfə, bərpa olunmuş sərhədlər daxilində səsvermə keçirilməsi diqqətəlayiq bir addım idi. Qarşıma çıxan bir çox mətbuat agentlikləri bunu dəfələrlə vurğulayıblar”.
Siyasi ekspert bildirib ki, İlham Əliyevin yenidən prezident seçilməsi ölkənin gələcəyəi üçün bir sıra müsbət vədlər verir.
“Əliyevin yenidən seçilməsi onun regionda bu günə qədər apardığı siyasətin davam etdiriləcəyi anlamına gəlir. Bu gələcək haqqında uğurlu vədlər verir. Çünki, indiyə kimi Əliyevin Qafqazda siyasi-iqtisadi fəaliyyəti dövlətlərarası münasibətləri inkişaf etdirmək yönündə olub. Bundan sonra da Azərbaycanda ağıllı şəhərlərin salınması, Yaşıl Enerji, COP29 və enerji yolları kimi yeni layihələr həyata keçiriləcək.
Düşünürəm ki, Ermənistanla Azərbaycan arasında sülh müqaviləsinin bağlanmasında da Əliyev hökümətinin ciddi rolu olacaq. Azərbaycanın regionda sülhü və qarşılıqlı əməkdaşlığı müdafiə edən ölkə kimi mövqeyi böyük dövlətlərin maraqlarına uyğun gəlir. ABŞ-da prezident seçkisi haqqında fikirlər hər nə qədər bir-birindən fərqli olsa da, səsvermənin şəffaflığı göz önündə olub. Azərbaycan xalqı öz tarixində görülməmiş bir aktivlik göstərərək öz lideri üçün səsvermədə iştirak edib”.
Fərid
