"İon - Adriatik boru kəmərinə gəlincə, onun qarşısında iki ciddi problem var. Birincisi, bu layihə Avropa Birliyinin ümumi maraqlar layihəsinə daxil edilməyib və ona görə də dəstək yoxdur. İkincisi, həmin layihə ölkələrinin istehlak edə biləcəyi təbii qazın həcmi çox aşağıdır. Dağlar kimi çox çətin relyefdə belə bir infrastruktur layihəsini qurmaq mümkün deyil. Onun hələ də reallaşmamasının səbəbi budur".
Ednews xəbər verir ki, bu fikirləri Azərbaycan Prezidenti İlham Əliyev aprelin 23-də ADA Universitetində keçirilən “COP29 və Azərbaycan üçün Yaşıl Baxış” mövzusunda beynəlxalq forumda Xorvatiyanın İnkişaf və Beynəlxalq Münasibətlər İnstitutunun rəhbər əməkdaşının Xorvatiya və Azərbaycan arasında mümkün qaz proyektləri ehtimalına cavabında deyib.
" Buna alternativ varmı? Bəli var. Biz bunun üzərində işləyirik. Təbii ki, kim İon Adriatik boru kəmərini çəksə, biz mütləq tədarükə başlayacağıq, çünki bizim əlavə qaz ehtiyatlarımız var. Əgər belə deyilsə, Xorvatiyaya və Xorvatiyadan Bosniya və Herseqovina və Monteneqrodakı qonşularınıza Macarıstan vasitəsilə əldə edilə bilər. Biz artıq bir neçə ay əvvəl Macarıstana qaz tədarükünə başlamışıq və məncə, bazara çıxış yolu budur. Bildiyimə görə, Xorvatiya və Albaniya hökumətlərinin nümayəndələri artıq bununla bağlı məsləhətləşmələr mərhələsindədirlər. Beləliklə, mən hesab edirəm ki, bu, daha real yoldur, çünki artıq dediyim kimi, biz fiziki olaraq Macarıstandayıq və Serbiya bazarına da daxil olmuşuq ki, bu da qonşuluq üçün marşrut ola bilər. Buna görə də, biz daha tez və daha az xərclə həyata keçirilə bilən variantları araşdırmalıyıq".
Əkbər