"Azərbaycan Avropa İttifaqının etibarlı tərəfdaşıdır".
Ednews-un məlumatına görə, bunu Aİ-nin ölkəmizdəki nümayəndəliyinin rəhbəri, səfir Peter Mixalko III Beynəlxalq Minatəmizləmə Konfransında deyib.
O bildirib ki, mina partlayışları nəticəsində insan tələfatları barədə xəbər təmsil etdiyi birliyi məyus edir:
"Bu gün planetin müxtəlif bölgələrində münaqişələr narahatlıq doğurur. Hesab edirik ki, Azərbaycanın minalarla çirklənmiş ərazilərinin təmizlənməsi bir nömrəli prioritetdir. Bu fəaliyyətin həyata keçirilməsində ANAMA ilə birlikdə beynəlxalq donorlar da iştirak edir. Minaların təmizlənməsi həm hökumət, həm də ictimaiyyət üçün böyük əhəmiyyət daşıyan bir prosesdir. Hesab edirik ki, Azərbaycanda bu prosesin icrasında həm beynəlxalq təşkilatlar, həm də hökumət üzərinə düşən bütün vəzifələri yerinə yetirir. Bu da son vaxtlaradək məcburi köçkün statusu daşıyan insanların öz evlərinə qayıdışı prosesinin sürətlənməsi məqsədi daşıyır. Azərbaycana bu sahədə texniki dəstəyin göstərilməsi ölkənin minasızlaşdırma işini daha sürətlə həyata keçirməsinə imkan verəcək. Bu sahədə ANAMA və UNICEF arasında da əməkdaşlıq mövcuddur. Fikrimcə, Azərbaycanın bütün beynəlxalq tərəfdaşları minatəmizləmə fəaliyyətində ölkəyə dəstək verməyə hazırdır. Bura həm ayrı-ayrı ölkələrin hökumətləri, həm də vətəndaş cəmiyyəti qurumları daxildir. Bu həm də sülh, sabitlik və təhlükəsizliyə verilən dəstəkdir" - səfir Peter Mixalko belə deyib.
