Prezidenti İlham Əliyev Kanadanın yeni təyin edilən səfiri Kevin Hamiltonun etimadnaməsini qəbul edərkən deyib ki, Azərbaycanla Ermənistan arasında imzalanacaq sülh müqaviləsinin mətni, əsas prinsipləri üzərində işi bir neçə aya yekunlaşdırmaq olar. Bununla yanaşı, Prezident İlham Əliyev qeyd edib ki, sülh sazişinin başlıca şərti Ermənistanın konstitusiyasının dəyişdirilməsidir.

“Çünki onun tərkibində Azərbaycana qarşı ərazi iddiaları var və bu, baş verməyənə qədər sülh sazişi imzalanmayacaq. Bu, məlum məsələdir”, - İlham Əliyev vurğulayıb.

Azərbaycan Prezidentinin mesajı nəyə hesablanıb? Ermənistan tərəfi İlham Əliyevin son mesajından nəticə çıxarıb konstitusiya dəyişikliyinə gedəcəkmi?

Bu barədə Ednews-a açıqlamasında politoloq Natiq Miri bildirdi ki, Prezident İlham Əliyevin açıqlaması bu hüquqi təminat üçündür. Çünki sülh müqaviləsinin imzalanması mahiyət etibarı ilə gələcək perspektivdə təhlükəsizliyi təmin etmir və təhlükəsizliyə ən böyük təhdid də Ermənistanın konstitusiyasında, müstəqil bəyənnaməsində, preambulasında qeyd edilən Azərbaycana ərazi iddiasıdır:

“Paralel olaraq 2022-ci ildə konstitusiyanın dəyişdirilməsi ilə bağlı Ermənistanın Baş Nazirinin verdiyi qərar dəyişdirilib. Artıq söhbət Konstitusiyanın dəyişdirilməsindən deyil, yeni konstitusiyanın hazırlanmasından gedir. Bu yöndə, Konstitusiyanın mətninin hazırlanması yönündə Konstitusiya şurasına göstəriş verilib və bu prosesin bitmə tarixi 2026-ci ilin dekabr ayına hesablanıb. Bu o deməkdir ki, 2026-cı ilin sonunda 2021-ci ildə Ermənistanda baş tutan növbədənkənar Parlament seçkiləri vasitəsilə hakimiyyətdə qalan Mülki Müqavilə partiyası, yəni Nikol Paşinyanın rəhbərlik etdiyi siyasi güc mərkəzinin vaxtı da bitir və yəni seçkilərə getmək prosesi başlayır. Belə olduğu təqdirdə bu yeni qərar Azərbaycan üçün gələcək perspektivə təminat ola bilərmi? Əksinə, çox ciddi risk amilləri daşıyır. Çünki növbəti seçkilərdə Nikol Paşinyan hakimiyyətdə qala bilməsə, yeni siyasi qüvvələr və ya hakimiyyət dəyişikliyi baş verdiyi təqdirdə heç bir sülh müqaviləsi konstitusiyadan üstün olmayacaq və konstitusiya məhkəməsinə müraciət kontekstində bu müqavilə ləğv ediləcək. Çünki bir neçə hüquqi normalar var ki, bir mənalı olaraq onlarda da əks olunur ki, heç bir müqavilə və saziş, xüsusilə də Qarabağla bağlı Konstitusiya müddəalərına zidd ola bilməz və heç bir hökumət belə bir qərara imza ata bilməz. Konkret bu yöndə qadağalar var, buna görə də indiki vəziyyətdə sülh müqaviləsinin mətninin hazırlanması Azərbaycan üçün hüquqi təminat olmadan heç nə ifadə etmir. Konstitusiya yaxın zamanda dəyişdirilmədiyi təqdirdə heç bir sülh prosesindən danışmağa dəyməz”.

Oğuz