İsrail və İran arasında münasibətlər son günlər daha da kəskinləşməkdə, gərginləşməkdədir. HƏMAS lideri İsmayıl Haniyənin Tehranda öldürülməsindən sonra İranın İsrailə hücum edəcəyi ilə bağlı hər gün xəbərlər yayılır. 

Əgər gözlənilən müharibə baş verərsə, Azərbaycanın mövqeyi necə olacaq? Müharibə ölkəmizin təhlükəsizliyinə, iqtisadiyyatına nə kimi təsir edə bilər? O cümlədən İrandan Azərbaycana köç ola bilərmi?

Mövzu ilə bağlı Ednews-a açıqlamasında Beynəlxalq Avrasiya Mətbuat Fondunun prezidenti Umud Mirzəyev iki ölkə arasında müharibənin baş verməsini real hesab etmir:

“Əsas düşündürücü məsələ ondan ibarətdir ki, İran rejimi hər zaman qüdrətli dövlət olduğunu dilə gətirir, ancaq qısa zaman kəsimində İbrahim Rəisinin və eyni zamanda HƏMAS lideri İsmayıl Haniyənin öldürülməsi İranın daxilində baş verdi və bu hadisələr kifayət qədər ciddi, düşündürücü məqamlardır. Reallıq və həqiqət isə tam fərqlidir. Hadisələrə müəyyən ehtimallar, fərziyyələri irəli sürüldü, hətta Azərbaycanın da adı hallandırıldı. Azərbaycanın mövqeyi Cənubi Qafqazda barış və sülhdür. Ölkəmizin xarici siyasəti, bəlli hədəfi bu yöndədir”.

U.Mirzəyev qeyd etdi ki, baş verən hadisələr İranın daxilindəki boşluqları göstərir:

“İranın çağırışlar etməsinə ehtiyac yoxdur. Çünki sənin bəlli bir hədəfin, missiyan mövcuddursa çağırışlara ehtiyac olmur. "24 saata İsraili vuracam, hücum edəcəm” kimi iddialı sözlərlə problem çözülmür. Bu mənada bu cür çağırışların özü də real görünmür. Dünya mediasının marağı, birmənalı məqsədi iki ölkə arasında olan gərginliyi artırmaq, beynəlxalq ictimaiyyətin diqqətini çəkmək daşıyır. Hazırda dünya kifayət qədər müharibələr yaşayır. Ən ciddi toqquşmalar - Qəzza, Ukrayna-Rusiya müharibələridir. Savaşların böyüyüb İrana keçid alması ağlabatan deyil”.

Oğuz