Moskva diplomatik kanallar vasitəsilə Azərbaycanın Xarici İşlər Nazirliyinin Qarabağ mövzusunun siyasi müzakirələrdə istifadə olunmaması ilə bağlı bəyanatına rəsmi cavab göndərəcək.
Bu barədə Rusiya Xarici İşlər Nazirliyinin rəsmi nümayəndəsi Maria Zaxarova brifinqdə bildirib.
Mövzu ilə bağlı EDnews-a açıqlama verən millət vəkili Rasim Musabəyov isə Rusiyanın son ritorikasını kəskin tənqid edib.
"Rusiya Prezidenti Vladimir Putin Ermənistanın Baş naziri Nikol Paşinyan ilə söhbətində qəfildən Qarabağ məsələsinin hələ bağlanmadığını deməsi, əslində onun tərəfindən bizim Rusiya ilə münasibətlərimizin səviyyəsinə uyğun olmayan bir ifadədir.
Ondan heç kim soruşmur ki, Qarabağ məsələsi bağlanıb ya yox. Və bu, ümumiyyətlə, böyük mənada onun işi deyil.
Öz əraziniz ilə məşğul olun, sizin öz problemləriniz, necə deyərlər, başınızdan aşır. Amma yox, ona mütləq Qarabağ məsələsinin həll olunmaması barədə nəsə demək lazım idi.
Nikol Paşinyan deyir ki, məsələ həll olunub və o, Ermənistanın baş naziridir. Azərbaycan deyir ki, bu məsələ bağlanıb.
Üstəlik, Nikol Paşinyan bildirir ki, Qarabağ ermənilərinin hansısa hissəsinin Azərbaycana qayıtması əslində problemi yenidən canlandıra bilər, bu mənada ki, Azərbaycan-Ermənistan münasibətlərinə əlavə gərginlik gətirə bilər.
Nəzərə alsaq ki, insidentlər baş verə bilər, hər şey mümkündür. Amma yox, deməli, Putinə mütləq bu problemlə yenidən gündəmə gəlmək lazım idi.
Aydındır ki, bu, ona görə edilib ki, Nikol Paşinyanın rəqibləri seçkilərə gedirlər, amma başa düşürlər ki, hansısa qondarma və dırnaqarası respublika məsələsini yenidən gündəmə gətirmək artıq mümkün deyil.
Ona görə də sülh müqaviləsində mütləq qeyd etmək istəyirlər ki, Qarabağ ermənilərinin təhlükəsiz şəkildə qayıtmaq hüququ var.
Aydındır ki, biz bu müqaviləni yenidən yazmayacağıq və sabah hətta Ermənistanda müxalifət hakimiyyətə gəlsə belə, Azərbaycan bu paraflanmış sülh müqaviləsinə heç bir dəyişiklik etməyəcək.
Hətta Rusiya da bu tələbi dəstəkləsə belə, bu cəhd heç nəyi dəyişməyəcək.
Dəyişə biləcəkləri yeganə şey onsuz da yaxşı olmayan Azərbaycan-Rusiya münasibətlərini daha da ağırlaşdırmaqdır.
Çətin ki, Rusiya bundan özü üçün nəsə qazansın, amma Azərbaycanda mənfi reaksiyanı daha da gücləndirəcək" - deyə, millət vəkili vurğulayıb.
Musabəyov Azərbaycanın Rusiya tərəfindən vurulan təyyarəsini xatırladaraq deyib:
"Təyyarə məsələsi də Rusiyanın mövqeyinə görə hələ bağlanmayıb və Rusiya hüquq-mühafizə orqanlarının Azərbaycan diasporuna qarşı etdiklərini də biz hələ unutmamışıq
Beləliklə, əgər Rusiyanın münasibətləri pisləşdirmək istəyi varsa, bu bizim seçimimiz deyil, amma belə çağırışlardan yayınmaq və ya bu cür davranış qarşısında geri çəkilmək – mən düşünürəm və tam əminəm ki, Azərbaycan bunu etməyəcək.
Artıq o dövr deyil və Azərbaycan da əvvəlki Azərbaycan deyil, Rusiya da əvvəlki Rusiya deyil" - millət vəkili söyləyib.
EDnews / Fatimə
.jpg)
