“Tətbiqi mexanika” beynəlxalq jurnalının (“Web of Science” beynəlxalq elmi bazasına daxildir) 2019-cu il 4 iyul nömrəsində Avropa Elmlər Akademiyasının Blez Paskal medalı (2007, mexanika sahəsində Nobel mükafatına bərabər hesab edilir), SSRİ (1985), Ukrayna (1979, 1988) dövlət və bir sıra başqa nüfuzlu mükafatların laureatı, Ukrayna Elmlər Akademiyasının həqiqi üzvü, Timoşenko adına Mexanika İnstitutunun direktoru, akademik Aleksandr Nikolayeviç Quz “Dağılma mexanikasının qeyri-klassik problemləri” tədqiqatlarının 50 illiyi münasibətilə 600-dən çox - əsasən Ukrayna, Türkiyə və Rusiya alimlərinin elmi məqalə və monoqrafiyasını əhatə edən geniş icmal çap etdirib. Beynəlxalq Avrasiya Mətbuat Fondundan AZƏRTAC-a bildirilib ki, bu icmalda Azərbaycan alimlərinin işlərinə də ciddi diqqət yetirilib və yüksək qiymətləndirilib. 

İlk növbədə, Azərbaycan Milli Elmlər Akademiyasının həqiqi üzvü Hətəm Quliyevin və AMEA-nın müxbir üzvü Surxay Əkbərovun dağılma mexanikasının qeyri-klassik problemlərinə, üç ölçülü cismlərin, tikililərin, qurğuların, kompozit materialların və mürəkkəb mexaniki sistemlərin deformasiyasına, dayanıqlığına, möhkəmliyinə və dinamikasına həsr olunmuş 70-dən çox elmi məqalələri və monoqrafiyalarına istinad edilmiş və onlarda alınmış elmi nəticələrə yüksək qiymət verilib. Qeyd etmək lazımdır ki, hal-hazırda alimlərimiz hər tərəfli mexaniki araşdırmalar əsasında  yer elmləri sahəsində geniş miqyaslı geomexaniki tədqiqatlar aparırlar. Bu tədqiqatların nəticələri dünyanın  bir sıra yüksək nüfuzlu  elmi jurnallarında çap edilir (onların sayı yüzlərcədir) və elmi ictimayyət tərəfindən yüksək qiymatləndirilir.  Beynəlxalq elmimetrik  Researchgate (RG) bazasında  Hətəm Quliyevin  və Surxay Əkbərovun  RG-reytingi 38-dən çoxdur.  

Bununla yanaşı, qürurvericidir ki, Ukrayna Milli Elmlər Akademiyasının Timoşenko adına Mexanika İnstitutunun 100-illiyinə həsr olunmuş və «Beynəlxalq tətbiqi mexanika» jurnalının 2018 ilin 1-ci nömrəsində bu hadisə ilə bağlı ingilis dilində çap olunmuş məqalədə Hətəm Quliyevin və Surxay Əkbərovun adları son yüz ildə Mexanika institutunda çalışmış böyük rus, ukrayna, SSRİ və digər  ölkələrin görkəmli alimləri sırasında şərəfli  yer tutduqları qeyd edilmişdir.  Akademik  Guz vaxtı ilə alimlərimizin NANU-nun Timoşenko adına Mexanika İnstitutunda yerinə yetirdikləri dissertasiya işlərinin rəhbəri və məsləhətçisi olub.  

Alimlərimizə daha böyük  uğurlar diləyirik.

Aşağıda elmi tədqiqatlarla bağılı nəşrləri link vasitəsilə əldə etmək olar:

https://link.springer.com/article/10.1007/s10778-019-00947-1

https://link.springer.com/article/10.1007/s10778-019-00954-2

https://link.springer.com/article/10.1007/s10778-019-00960-4

AzerTag.az