Hacıqabul Sənaye Məhəlləsində kommersiya və xüsusi təyinatlı avtomobillər istehsal olunacaq. Artıq zavodun tikintisi başa çatmaq üzrədir. İstehsal Azərbaycanın “Azərmaş” ASC və Rusiyanın Qorki Avtomobil Zavodunun (QAZ Qrup) birgə həyata keçirdikləri layihə çərçivəsində gerçəkləşəcək.
"EDNews" “Azərmaş” ASC-nin İdarə Heyətinin sədri Emin Axundovun AZƏRTAC-a verdiyi məlumata istinadən xəbər verir ki, sənaye məhəlləsində zavodun təməli ötən il qoyulub. Tikintinin sürətlə aparılması üçün ərazidə kifayət qədər canlı işçi qüvvəsi və müxtəlif təyinatlı texnikalar çalışır. Zavod əsas binadan və yardımçı tikililərdən ibarətdir. Hazırda əsas binada montaj-quraşdırma işləri başa çatır. Eyni zamanda, yardımçı tikililərdə son tamamlanma işləri yerinə yetirilir.
Görülən işlərlə yanaşı, zavod üçün avadanlıqlar da sifariş verilib. Yaxın zamanlarda avadanlıqlar gətiriləcək və onların quraşdırılmasına başlanacaq. Sınaq müddətində avadanlığın işlədilməsi və yığım işlərinə başlanılması nəzərdə tutulub. Hətta cari ildə zavodda ilk məhsul buraxılışı gözlənilir.
“İl ərzində təxminən 1000 ədəd QAZ markalı, müxtəlif təyinatlı avtomobil yığılması mümkün olacaq. Zavodun fəaliyyətə başlaması nəticəsində 100 nəfərin işlə təmin olunması nəzərdə tutulur”, - deyə E.Axundov bildirib.
