Xəbər verdiyimiz kimi, Sumqayıt şəhər 32 saylı orta məktəbin direktoru Esmira İbrahimova işdən çıxarılıb. Buna səbəb isə onun müəllimlərdən pul tələb etməsi olub. 

Xatırladaq ki, E.İbrahimovanın müəllimlərdən açıq-aşkar pul tələb etməsi ilə bağlı səs yazısı yayılıb. O, votsap qrupuna səs ataraq təmir bəhanəsi ilə hər müəllimdən 50 manat tələb edib. Maraqlıdır ki, əgər həmin məktəblərdə olan avadanlıqların hər hansı təmirə ehtiyacı olarsa, bu zaman məktəb rəhbərliyinin valideyndən pul tələb etmək haqqı varmı ?

Ednews məsələ ilə bağlı Təhsil nazirliyinin İctimaiyyətlə Əlaqələr bölməsinin rəhbəri Cəsarət Valehov  və təhsil eksperti Kamran Əsədovdan münasibət öyrənib.

Cəsarət Valehov:

“Əgər bilərəkdən məktəbdəki avadanlıqlara zərər yetirilirsə bu zaman məktəb rəhbərliyinin valideyni məktəbə dəvət edərək pedaqoji şurada həmin avadanlığın övladı tərəfindən zərər gətirildiyini bildirməlidir. Yəni məktəb rəhbərliyi valideynə məktəb avadanlığına dəymiş ziyanın ödənilməsi ilə bağlı  müraciət edə bilər. Çünki bu müvafiq istismar müddəti var. Nəzərə alaq ki, bu avadanlıqları digər şagirdlər də istifadə edə bilər”.

Kamran Əsədov:

“Azərbaycan Respublikasının Kontitusiyasına və Təhsil haqqında qanununa görə Azərbaycanda təhsil icbaridir. Bu o deməkdir ki, Təhsilin icbariliyi və ödənişsizliyi dövlət tərəfindən həyata keçirilir. Bu zaman tədris prosesində olan bütün resursların alınması, təmirin dağılmasına görə, yenidən bərpası təhsil müəssisəsi tərəfindən həyata keçirilir. Əlbəttə, bu o demək deyil ki, şagird istədiyini edə bilər. 2011-ci ildə qəbul edilən orta təhsil məktəblərinin nizamnaməsinə görə şagirdlərin öhdəlikləri var. Amma təhsil müəssisəsinə dəymiş zərərin ödənilməsi şagirdlərə şamil edilmir. Əgər şagirdin hər hansıməsuliyyətsizliyinə görə, məktəbin avadanlıqlarına zərər dəyərsə bu zaman təmir olunması üçün təhsil qurumuna göndərilir. Bunun üçün valideyndən hər hansı pul tələb oluna bilməz. Dəymiş zərərin ödənişi məkətəbin tabe olduğu yuxarı qurum tərəfindən həyata keçirilir. Bu məqsədlə hər il təhsilə 4 milyon manat vəsait ayrılır. Təbii ki, dəymiş zərərin ödənilməsi də bura daxildir”.