Son zamanlarda sosial şəbəkələrin tez-tez çökməsi istiadəçilərin narazılığına səbəb olub. Belə ki, bir müddət davam edən durğunluqdan sonra bəzi sosial şəbəkə istifadəçiləri hesablarına yenidən daxil ola bilməyiblər.
Bəs, sosial mediadan aktiv istifadə edən şəxslər hansı nüanslara diqqət yetirməlidir? İstifadəçilər öz hesablarını kiberhücumlardan necə qoruya bilərlər?
Məsələ ilə bağlı Ednews-a açıqlama verən Multimedia" İnformasiya Sistemləri Texnologiyaları Mərkəzinin direktoru, Azərbaycan İnternet Forumunun prezidenti Osman Gündüz kiberhücumların Azərbaycanın bütün sahələrində müşahidə olunduğunu bildirib.
“Müşahidələrimizə əsasən, istifadəçilər öz sosial media hesablarına qarşı hücumlardan, onların ələ keçirilməsindən şikayətlənirlər. Düşünürəm ki, bu məsələləri aradan qaldırmaq üçün ilk növbədə istifadəçilər özləri elementar təhlükəsizlik qaydalarını təmin etməlidirlər”.
O, bununla bağlı olaraq sosial media və şəbəkələrdə müəyyən təhlükəsizlik normalarının olduğunu vurğulayıb.
“İnternetdən, messencerdən, emaildən yaxud sosial mediadan istifadə edəndə normalara diqqət yetirmək lazımdır. Qeydiyyat necə aparılmalıdır, ikiqat şifrələmə nə deməkdir və s. kimi məsələlərdən istifadəçi özü mütləq məlumatlı olmalıdır”.
Osman Gündüz Azərbaycanda rəqəmsal savadlılıqla bağlı problemlərin olduğunu deyib.
“Aidiyyatı dövlət qurumları tərəfindən bu istiqamətdə görülən tədbirləri yetərli hesab etmək olmaz. Məsələn, Rəqəmsal İnkişaf və Nəqliyyat Nazirliyinin “Elektron təhlükəsizlik” xidməti fəaliyyət göstərir. Sözügedən xidmət qeyri-dövlət sektorunda vətəndaşlar və onların informasiya təhlükəsizliyinə cavabdehdir. Amma qurum tərəfindən müəyyən addımlar atılsa da, kifayət etmir”.
Direktor Elektron Təhlükəsizlik Xidmətinin işləri canlandırmalı olduğunu da qeyd edib.
“Qurumun fəaliyyəti yetərli olsaydı, bugün informasiya təhlükəsizliyi ilə bağlı problemlər olmazdı. Elektron Təhlükəsizlik xidməti regionlarda seminarlar təşkil etməli, məlumatlılığı artırmalıdır. Məlumatlandırma üçün isə saytlardan, televiziyadan, sosial roliklərdən, xəbər resurslarından istifadə edilməlidir”.
Osman Gündüz istifadəçilərin özünün informasiya təhlükəsizliyinə əməl etməsilə yanaşı, xidmətin də onlara metodiki informasiya dəstəyi göstərməli olduğunu bildirib.
“Metodiki informasiya göstərmək məsələsi həmin qurumun özünün əsasnaməsində də qeyd olunub ki, istifadəçilərə yardım edilsin. İstifadəçilər də aldıqları mesaj və linklərlə bağlı ehtiyyatlı olmalıdırlar. Çünki, belə mesajların tərkibində aldadıcı, şirnikləndirici məqamlar da olur”.
Nəzrin Beydiyeva