"Dövrümüz alimləri və astrofizikləri insanlara yadplanetlilərdən qaçmağı, onlarla heç bir kontaktda olmamağı, əlaqə qurmamağı tövsiyə edirlər. Bunun bizim üçün böyük faciələrə səbəb olacağını bildirirlər".
Uçan naməlum obyektlərin (UNO) varlığı hələki, rəsmi olaraq öz təsdiqini tapmasa da alimlər Yerdən kənar həyatın axtarışını davam etdirirlər. Kainatın çox böyük olduğu, Yerdən başqa digər planetlərdə də həyatın, canlıların mövcudluğu inkar edilmir. Günümüzdə bu barədə dəqiq araşdırmalar olmasa da bir sıra elmi nəzəriyyələr, həmçinin, paralel kainatlar nəzəriyyəsi bu ehtimalın doğruluğunu təsdiq etməyə əsas verir.
Müstəqil araşdırmaçı Nazim Həsənov UNO-larla bağlı bir sıra maraqlı məlumatlar bölüşüb. O, Ednews-a verdiyi müsahibədə yad planetlilərlə bağlı insanlarda sual yaradan məqamlara aydınlıq gətirib.
O bildirib ki, yadplanetlilərin və UNO-ların hər hansı bir atmosfer hadisəsi və yaxud illüziya olduğu güman olunur. Yerdən kənar həyat və uçan naməlum obyektlərin qədim zamanlardan dövrümüzə qədər bir çox alimin xüsusi maraq dairəsində olduğunu qeyd edən N.Həsənov qeyd edib ki, insanlar indiyə kimi görmədikləri varlıqlarla bağlı suallara cavab axtarmağa çalışırlar.
“Mövzunu dəqiq cavablamaq bir qədər çətindir. Kainat təsəvvürlərimizə sığmayacaq qədər böyükdür, sonsuzdur. Kainatda Yer planetindən başqa digər planetlərdə də həyatın, yaşamın mövcudluğunu elm qəbul edir. Məşhur astrofizik Karl Saqanın sözlərinə görə, əgər, bu boyda kainatda təkcə Yerdə həyat olsaydı, bu, israfçılıq olardı. Onun sözünə qüvvət, demək istəyirəm ki, 1995-ci ildən günümüzə qədər başqa ulduzlar ətrafında beş mindən artıq ekzoplanet kəşf olunub. Onların da təxminən 30 faizə yaxını Yer tipli planetlərdir. Onlarda həyatın var olduğu ehtimal edilir. Sadəcə olaraq, məsafə uzaqlığı baxımından onların dəqiq müşahidəsi indik vaxtda mümkün deyil. Əgər biz qalaktikadan hər hansı siqnal qəbul etsək, qəbul olunmuş siqnalın araşdırılması və həmin ulduz sisteminə siqnalın göndərilməsi minlərlə, hətta milyonlarla il vaxt ala bilər. Təxminən 30 işıq ili qədər uzaq məsafədə olan hər hansı planetdə həyat aşkar etsək, bizim ora siqnal göndərib və geri siqnal qəbul etməyimiz 60 ilə başa gələ bilər. Kosmik məsafələr fantastik olduğundan yad planetlilərin belə məsafələrdə axtarışı və onlarla əlaqənin qurulması praktik olaraq mümkünsüzdür. Qədimdən indiyə qədər Yer kürəsi əhalisi tərəfindən yadplanetlilərin görülməsi barədə çoxsaylı yazılı qeydlər aparılıb. Qədim Şumer və Misir kitabələri və orta əsrlərdən günümüzə qədər bir çox yazılı mənbələr bu faktı sübut etməyə çalışıb. Lakin bu məlumatların heç də hamısının doğru olduğunu deyə bilmərik. Son dövr məlumatlarının bir çoxu uydurmadır, deyərdim. Əsasən, maraq və reytinq xətrinə media orqanları belə saxta xəbərlər tirajlayırlar”.
(Jacques Legrand - “Le Livre Des Bonnes Moeurs" kitabından, Fransa, 1338-ci il)
Araşdırmaçı yadplanetlilərin fərqli olmasından danışıb, bildirib ki, onlar forma və məzmun, kimyəvi tərkib baxımından və quruluşca tamam fərqli varlıqlar ola bilər.
“İnkişaf səviyyələrinə görə isə onlar bizdən qat-qat üstündürlər. Bu da ona əsaslanır ki, müşahidə olunan və mənbələrdə barələrində məlumatlar təqdim olunan UNO-lar çox böyük texnoloji üstünlüklərə malikdirlər. Lakin bizdən daha zəif inkişaf edən yad varlıqlar da ola bilər. Kainatın çoxölçülü sistem olduğunu nəzərə alsaq, bu sistemlərdə müxtəlif varlıqların yaşaması da təmamilə mümkündür.
İnsanlar bəzən bilməməzlikdən təbiət hadisələri, atmosferdə baş verənlər səbəbilə yaranan hansısa cisimlərin, meteoritlərin və s. yad cisim olduğunu düşünürlər. Bu o demək deyil ki, onlar yad planetlərdən gələn obyektlərdir. Son dövrlərdə insan istehsalı olan vasitələr – dronlar, pilotsuz təyyarələr yadplanetlilər mövzusunda çaşqınlıq yaradır. İnsanlar müşahidə etdikləri hər uçan obyektin texnoloji bir vasitə, yoxsa, yad planetdən gələn naməlum obyekt olduğunu qarışdıra bilərlər”.
(Karlo Krivelli - "Müqəddəs Emidiusla Müjdə" tablosu, 1486-cı il)
Yadplanetlilərlə qarşılaşmaq ehtimalımız varmı? Onlarla üzləşsək nə etməliyik?
N.Həsənov qeyd edib ki, son vaxtlar müxtəlif ölkələrin səmasında tez-tez rastlanılan uçan naməlum obyektlərlə bağlı rəsmi açıqlamalar yoxdur. Rəsmi mənbələrdə bunlar izah oluna bilməyən obyektlər kimi göstərilir.
“Onların, adətən, Yerə heç bir təhlükə törətmədiyi, bəzilərinin hərəkətsiz olduğu, bəzilərininsə, ümumiyyətlə manevr qabiliyyətinin olmadığı bildirilir. Onlardan bəzilərinin kosmik stansiyalar tərəfindən peykə buraxıldığı da ehtimal olunur. Bunların Yer mənşəli yoxsa yad planetli olması barədə dəqiq nəsə demək olmur.
Dövrümüz alimləri və astrofizikləri insanlara yadplanetlilərdən qaçmağı, onlarla heç bir kontaktda olmamağı, əlaqə qurmamağı tövsiyə edirlər. Bunun bizim üçün böyük faciələrə səbəb olacağını bildirirlər.
(İsa Məsihin çarmıxa çəkilməsi mövzusunda 1350-ci ildə çəkilmiş əsər - “İki UFO”)
(İtalyan rəssamı Domenico Girlandayo - "Müqəddəs Giovannino ilə Madonna" tablosu, 15-ci əsr)
“Son dövrlərdə müasir radioteleskoplarla kainatın canlı həyat əlaməti olan müxtəlif bölgələrinə Yerdən radiosiqnallar göndərilir. Son riyazi hesablamalara əsasən, təxminən 5-10 il müddətində Yerdən kənar həyatın mövcudluğuna dair ipucları, bunun təsdiqi haqqında məlumatların mütləq olaraq aşkar edilməsi gözlənilir. Bu müddət 25-30 ilə qədər də uzana bilər. Yenə də biz yad planetlərin kəşfinin astanasına olduğumuzu hesab edə bilərik.
Yadplanetlilərlə qarşılacağı halda Yer insanının aqibəti necə olacaq? – bununla bağlı bir fikir yoxdur. Alimlər bundan qaçışın olmadığını bildirirlər”.
Törə Zeynal