Azərbaycanda dövlət məktəbəqədər təhsil müəssisələrində çalışan 5800 nəfər tərbiyəçi-müəllimin bu sahə üzrə müvafiq ali və ya orta ixtisas təhsili yoxdur.
Bu barədə Elm və Təhsil Nazirliyi açıqlama verib. Bildirilib ki, məktəbəqədər təhsil müəssisələri nazirliyin tabeliyinə verildikdən sonra aparılan monitorinqlərin nəticəsində, 11300 nəfər tərbiyəçi-müəllimdən 51%-nin (5800 nəfər) müvafiq ali və orta təhsilinin olmadığı məlum olub.
Məsələ ilə bağlı Ednews-a danışan Azərbaycan Respublikası Elm və Təhsil Nazirliyi yanında İctimai Şuranın üzvü, fəlsəfə doktoru İlqar Orucov bildirib ki, bu fakt yerli icira hakimiyyəti orqanlarının tabeliyində olduğu vaxtlarda məktəbəqədər təhsil müəssisələrinə münasibətin necə olduğunu göstərir.
“Təbii ki, bu, kifayət qədər ciddi rəqəmdir və bizləri sual altında qoyur. 5800 nəfəri bu sahədən uzaqlaşdıraraq iş yerlərindən çıxarıb onların narazılığı ilə üzləşmək, yoxsa təhsilimizi qurtarmaq? Düşünürəm ki, ikinci yolu seçməliyik. Çünki məktəbəqədər təhsil müəssisəsi təhsilin ilk pilləsidir və təbii ki, biz keyfiyyədən danışırıqsa, övladlarımıza keyfiyyətli təhsil vermək istəyiriksə, mütləq şəkildə, bu məsələyə diqqəti artırmalıyıq. Burada illərlə nəzarətsiz bir mühit formalaşıb. Bu şəxslər tapşırıq, rüşvət yolu ilə işə götürülüb. Təhsilə münasibətdə bu cür yanaşma həm də dövlətə, xalqa xəyanətdən başqa bir şey deyil”.
Ekspert düşünür ki, məktəbəqədər təhsil sistemi, bağçalarda tərbiyəçilərin işə qəbulu prosesi yenilənməlidir.
“Elm və Təhsil Nazirliyi məktəbəqədər təhsil müəssisələrində rəhbər vəzifələrə təyinatlarla bağlı ciddi mexanizm ortaya qoyub. Nazirlik bu müəssisələrdə müəllim və tərbiyəçilərin də işə qəbulunda yeni mexanizm tətbiq etməyi hədəfləyir. Məktəbəqədər təhsil müəssisələrinin nazirliyin tabeliyinə verilməsinin müsbət nəticələrini görəcəyik. Keyfiyyətin və şəffaflığın artacağını düşünürəm. Təhsilə münasibət dövlətin gələcəyinə olan münasibətdir. Təhsildə kadr seçiminə ciddi yanaşmalıyıq”.
İ.Orucov qeyd edib ki, yeni mexanizmlər təhsilin bütün pillələrini əhatə etməli, kompleks tədbirlər görülməlidir:
“Heç kəsə sirr deyil ki, bu rəqəmin əhatə etdiyi insanlar zamanında bu müəssisələrə necə axışıblar. Əminəm ki, məktəbəqədər təhsil müəssisələrində, hətta ali təhsil ocaqlarında da yeni metod tətbiq edilsə, biz təhsilimizdə böyük irəliləyişlərin şahidi olacağıq”.
Qeyd edək ki, Elm və Təhsil Nazirliyi məktəbəqədər təhsil müəssisələrinə uşaqların qəbulunu elektron qaydada həyata keçirir, həmçinin məktəbəqədər təhsil müəssisələrinə tərbiyəçi-müəllimlərin işə qəbulu prosesi də ilk dəfə mərkəzləşdirilmiş müsabiqə yolu ilə təşkil olunaraq 102 nəfər işə qəbul edilib.
Törə Zeynal