Şəxsi Məlumatların Qorunması Qurumu ("KVKK"), uşaqların istifadə etdiyi hesablarla bağlı "Meta" şirkətinə, 6698 saylı Şəxsi Məlumatların Qorunması Qanununun müddəalarını pozduğu üçün 11 milyon 500 min lirə məbləğində inzibati cərimə tətbiq edib.  

EDnews xəbər verir ki, qurumun qərarına əsasən, 18 yaşdan aşağı istifadəçilərin açdığı gizli "Instagram" hesablarının kommersiya hesabına çevrilməsi və bu yolla hər kəsin həmin hesabları görə bilməsinə şərait yaradılması səbəbilə uşaqların şəxsi məlumatlarının və məxfiliyinin pozulduğu iddiaları üzərində araşdırma aparılıb.  

Araşdırma nəticəsində, "Instagram" kommersiya hesablarındakı elektron poçt ünvanı və telefon nömrələrinin "Instagram"ın HTML mənbə kodunda yer aldığı və bu məlumatların hər kəs tərəfindən əldə oluna biləcəyi müəyyən edilib. Bu, uşaqların onlayn təhlükələrə qarşı müdafiəsiz qalmasına səbəb olub.  

"Meta"nın, məlumat təhlükəsizliyini təmin etmək üçün texniki tədbirləri kifayət qədər tətbiq etmədiyini qeyd edən "KVKK", uşaqların şəxsi məlumatlarının hər kəs tərəfindən əldə edilə bilməsinin onlar üzərində mənfi təsir göstərə biləcəyini bildirib.  

Bu səbəblə, "KVKK", məlumat təhlükəsizliyini təmin etmək üçün lazımi texniki və inzibati tədbirləri almayan və qanunvericilik çərçivəsində bildiriş öhdəliyini yerinə yetirməyən "Meta"ya 2 milyon 500 min lirə cərimə kəsib.  

Bundan əlavə, uşaqlara məxsus gizli "Instagram" hesablarının kommersiya hesabına çevrilməsi prosesində yaş kriteriyasının yoxlanılmaması və valideynlərin məlumatı və nəzarəti əsasında keçid üçün heç bir tədbirin görülməməsi səbəbilə "Meta"ya əlavə olaraq 9 milyon lirə cərimə tətbiq edilib.  

Beləliklə, Türkiyədə 50 milyondan çox istifadəçisi olan "Meta"ya ümumilikdə 11 milyon 500 min lirə cərimə kəsilib.