Artıq bir neçə aydır paytaxtda qəzalı vəziyyətdə olan binaların söküntüsü davam edir. İşlərin gedişi ilə bağlı baş nazirin müavini Abid Şərifov "Xəzər Xəbər"ə eksklüziv müsahibə verib. Açıqlamada bu binaların nə vaxt təhvil veriləcəyi, növbəti mərhələdə isə hansı ərazilərin söküləcəyi ilə bağlı bir sıra suallara cavab var.
Paytaxtda istismar müddətini tamamlamış, qəzalı vəziyyətdə olan evlərin söküntüsü davam etdirilir. Pirallahı və Xəzər rayonları istisna olmaqla, Bakının bütün rayon icra hakimiyyətlərinə bu səlahiyyət verilib.
Baş nazirin müavini Abid Şəriovun sözlərinə görə, pilot layihə çərçivəsində artıq 1726 qəzalı vəziyyətdə olan tikili sökülüb. Bu binalarda yaşayan 3436 ailə isə mənzil-məişət şəraitlərinin yaxşılaşdırılması üçün müvəqqəti olaraq köçürülüb.
Abid Şəriov bu layihənin köhnə tikililərin yerində çoxmərtəbəli bina tikən iş adamlarının da xeyrinə olduğunu deyib. Onların ayrı-ayrı qurumlara müraciət edib əlavə vaxt itkisindən azad olduqlarını bildirib.
Qeyd edək ki, bu il ərzində yalnız Sabunçu rayonunda 1 bina təhvil verilib. Artıq binaların nə vaxt veriləcəyi tarix də məlumdur.
Tikinti prosesi zamanı köçürülən əhali yaşayış yeri ilə təmin olunur. Proses tamamlandıqdan sonra onlar sahəsi əvvəlkindən daha böyük olan və tam təmirli evlərlə təmin olunacaqlar.
Baş nazirin müavini Abid Şəriov yeni görkəm alan "Sovetski" adlanan ərazi ilə bağlı da danışıb. O, birinci mərhələdə işlərin uğurla yekunlaşdığını qeyd edib. Az sahəli evlərdə yaşayan insanların tikilən 2 doqquzmərtəbəli binada mənzillərlə təmin olunduqlarını bildirib.
Abid Şərifovun sözlərinə görə, layihə böyük vəsait tələb etdiyindən işlər mərhələli şəkildə həyata keçirilir. Baş nazirin müavini layihənin növbəti mərhələsi kimi "Xutor" adlanan ərazidəki evlərin söküləcəyini də açıqlayıb.
