2018-ci ildə keçirilməsi nəzərdə tutulan ali təhsil müəssisələrinə qəbul imtahanlarının vaxtı açıqlanıb.
Ali təhsil müəssisələrinə II və III ixtisas qrupları üzrə birinci (yaz) qəbul imtahanı mayın 13-də, I və IV ixtisas qrupları üzrə isə mayın 20-də keçiriləcək. İkinci imtahan isə I və IV ixtisas qrupları üzrə iyulun 18-də, II və III ixtisas qrupları üzrə iyulun 26-da keçiriləcək. V ixtisas qrupu üzrə əvvəlki illərin məzunları üçün qəbul imtahanı iyulun 10-da olacaq.
Psixoloqların sözlərinə görə, əksər abituriyentlərin qəbul imtahanını həyatlarının həlledici mərhələsi hesab etməsi onlarda sonradan psixoloji problemlərə səbəb olur. Bu probemin formalaşmasında valideynlər birbaşa yaxından iştirak edirlər.
Psixoloq Murad İsayev bildirib ki, abituriyentlərə məsləhət verən zaman onların valideynlərinə də yönəlmək lazımdır:
“Abituriyentlərin birbaşa stres və gərginliyinin mənbəyi valideynlərin özləridir. Abituriyentlərdə təbii stress olmalıdır. Amma bu həyəcan və gərginlik həddindən artıq hala gətirilməməlidir. Müəllim, valideyn və yaxın qohumların bu cür psixoloji təziqlərin formalaşmasında rolları kifayət qədər çoxdur. Bu təziqlər psixoloji cəhətdən bir balaca zəif olan uşaqlarda fəsadlar formalaşdırır. Bu fəsadlar nəinki imtahan zamanı, həttə univeritetə qəbul olduqdan sonra belə hiss olunur.
Uşaqlarda yaranan fəsadlardan biri beyin yorğunluğudur. Buna psixoloji yorğunluq da deyilir. Uşaq illərdir hazırlanan materialları bir neçə il ərzində öyrənməyə çalışır. Bu, psixoloji olaraq gərginlik yaradır.Daha sonra yaxın əhatənin uşaqlarda yaratdıqları psixoloji təzyiq. Bütün bu faktorlar toplanan zaman diqqət çatışmazlığı, psixoloji yorğunluq, yaddaşsızlıq, unutqanlıq və s. problemlər ortaya çıxır. Bu formada yaranan psixoloji problemlər sonrada ağır psixoloji xəstəliklərə qədər gəlib çata bilir. Universitetə qəbul olmaq hər şey demək deyil. Universitetə qəbul olandan sonra uşağın sağlamlığını itirməsi, psixoloji, nevroloji tərəfdən problemlərin yaranması özü bir bəladır. Birinci kursda uşaqların dərslərinə adaptasiya olmaması elə bununla bağlıdır”.(metbuat.az)