“Loqos”un Azadlıq filialında Azərbaycan Mətbuat Şurası, Psixoloji Xidmət və Tədqiqatlar İctimai Birliyi və “Loqos” Psixoloji və Nitq İnkişaf Mərkəzinin təşkilatçılığı ilə “Vətəndaş Cəmiyyətinin psixoloji maarifləndirilməsi və Media” layihəsinin açılış mərasimi keçirilib.
Açılış mərasimində Mətbuat Şurasının sədri, millət vəkili Əflatun Amaşov, “Loqos” Psixoloji və Nitq İnkişaf Mərkəzinin rəhbəri və Psixoloji Xidmət və Tədqiqatlar İctimai Birliyinin sədri, psixologiya üzrə fəlsəfə doktoru Təranə Məmmədova, “525-ci qəzet”in baş redaktoru Rəşad Məcid, Beynəlxalq Avrasiya Mətbuat Fondunun sədri Umud Rəhimoğlu, Milli Ensiklopediyanın direktor müavini, şair Vaqif Bəhmənli, “7NEWS”.az saytının rəhbəri, ASGA-nın sədri Səbuhi Abbasov, filologiya üzrə fəlsəfə doktoru, jurnalist Billurə Aslanqızı və layihəyə qatılan jurnalistlər iştirak ediblər.
Açılış mərasimi PXTİB və “Loqos” un fəaliyyətini özündə ehtiva edən videoçarxın nümayişi ilə start götürüb.
Daha sonra tədbiri açıq elan edən Milli Ensiklopediyanın direktor müavini Vaqif Bəhmənli layihə haqqında geniş təqdimat edib.
Çıxış edən “Loqos” Psixoloji və Nitq İnkişaf Mərkəzinin rəhbəri Təranə Məmmədova layihənin məqsədi və ideyası haqqında məlumat verib.
Tədbirin əvvəlində "Loqos”un Mətbuat şöbəsinin rəhbəri Gülgün Quliyeva təqdimatla çıxış edib. O qeyd edib ki, 2014-cü ilin mart ayında fəaliyyətinə yalnız nitq qüsurlu uşaqlara xidmət etməklə başlayan “Loqos” Psixoloji və Nitq İnkişaf Mərkəzi artıq beş ilə yaxındır ki, əhalinin bütün yaş qruplarına kompleks şəkildə psixoloji, psixo-pedaqoji və loqopedik xidmət göstərir. Hazırda “Loqos”un paytaxt Bakıda 5, bölgələrdə 5 filialı var. Onun sözlərinə görə, mərkəzdə “Müasir Azərbaycan Qadını”, “Ailədən başlanan gələcək”, “Psixologiya akademiyası”, “Mənim ilk uğurum”, “Məktəbdən başlanan həyat”, “Mənim ilk təcrübə məktəbim” və s. kimi bir-birindən maraqlı və faydalı layihələr həyata keçirilib.
"Loqos Psixoloji və Nitq İnkişaf Mərkəzi V.M.Bexterev adına Psixiatriya Elmi-Tədqiqat İnstitutu da daxil olmaqla dünyanın məhşur psixoloji sağlamlıq mərkəzlərilə sıx əməkdaşlıq edir, təcrübə mübadiləsi aparır", deyə Gülgün Quliyeva qeyd edib.
Tədbirdə çıxış edən Əflatun Amaşov hazırda Azərbaycan jurnalistikasında sürətlə ixtisaslaşma getdiyini və jurnalistlərin hətta dar çərçivədə belə psixoloji məlumatlandırılmasının onlara uğur gətirəcəyini bildirib. O jurnalistlərin müsahibə aldığı şəxsin psixoloji durumunu nəzərə almalı olduqlarını xüsusi vurğulayıb.
Daha sonra Beynəlxalq Avrasiya Mətbuat Fondunun prezidenti Umud Mirzəyev "Loqos"un xoşniyyətli fəaliyyətinin diqqqətəlayiq olduğunu bildirib. O, media qurucuları ilə layihənin “Loqos”un tərcümeyi halında yaxşı bir səhifənin açılmasına səbəb olacağını deyib. Umud Mirzəyev həmçinin, jurnalistlərin "Loqos”la bağlı düzgün məlumatın yayılmasında yadımçı olacaqlarını, eyni zamanda, layihəyə qoşulanlara inadkar olmağı, bu sahədə daha yaxşı söz deyə bilməyi və onları qaliblər sırasında görməyi arzulayıb.
“7NEWS”.az saytının rəhbəri isə bildirib ki, mediada ölkəmiz üçün strateji əhəmiyyət daşıyan istiqamətlərdə psixoloji amillərin gözlənilməsi vacibdir. Əks halda bu hər hansı bir hərbi əməliyyatın keçirilməsi zamanı əsgər yola salan ailələrdə problemlərə gətirib çıxarar, cəmiyyətdə çaşqınlıq yarada bilər. O həmçinin, təlimlər zamanı jurnalistika ilə bağlı bütün istiqamətlərdə lazımi məlumatların veriləcəyinə əmin olduğunu deyib.
Layihənin rəsmi açılış mərasimindən sonra layihə iştirakçısı olan jurnalistlər üçün “İnsan psixologiyası, mənəviyyat və mətbuat” mövzsunda təlim keçirilib. Təlimin media hissəsini Milli Ensiklopediyanın direktor müavini Vaqif Bəhmənli , psixologiya hissəsini psixologiya üzrə fəlsəfə doktoru, “Loqos” un baş psixoloqu Elmira Mirzəyeva məlumat verib.
Qeyd edək ki, Loqos Psixoloji və Nitq İnkişaf Mərkəzi jurnalistlər üçün “Vətəndaş Cəmiyyətinin psixoloji maarifləndirilməsi və Media” layihəsi çərçivəsində təlimlərə start verib. 29 may-05 iyun tarixlərində "Loqos"un peşəkar psixoloqları tərəfindən keçirilməsi nəzərdə tutulan təlimlər daha sonra regionlara ekskursiyalarla davam edəcək.