Ali məktəblərə qəbulun ixtisas seçimi artıq başa çatıb. Abituriyentlər yaxın günlərdə hansı universitetə qəbul olunub-olunmayacaqları barədə məlumat əldə edəcəklər.

Nəticələr elan olunduqdan sonra isə abituriyentlərin bir qismi nəticələrinə uyğun olaraq dövlət sifarişi, digər qismi isə ödənişli əsaslarla təhsil alacaqlar.

Bizdə isə universitetlər ödənişli əsaslarla daxil olan tələbədən birinci kursun ödənişini elə qeydiyyat prosesində tələb edirlər. Digər illərin ödənişi isə tələbənin oxuduğu kurs müddətində hissə-hissə ödənilir.

Birinci kursa daxil olan tələbə üçün ödənişin bütöv şəkildə verilməsi onun ailəsinə maddi sıxıntılar yaşadır.

Universitetlər ailələrin yaşadığı bu sıxıntını nəzərə alıb, birinci kursda oxuyacaq tələbələrə hər hansı güzəşt etməlidirmi?

Eurasia Diary xəbər verir ki, azedu.az məsələ ilə bağlı Azərbaycan Kooperasiya Universitetinin rektoru, Milli Məclisin deputatı Eldar Quliyevin fikirlərini alıb.

O, ümumi şəkildə danışmasa da, rəhbəri olduğu ali təhsil ocağında tələbənin ödənişi ödəyə bilmirsə, o zaman  ərizə ilə müraciət edə biləcəyini deyib. Çox hallarda isə tələbənin bu təklifi müsbət olaraq qiymətləndirilir və ona güzəşt olunur:

“Tələbənin maddi sıxıntısının nəzərə alınmasında heç bir problem yoxdu və biz ona əlimizdən gələn dəstəyi göstərməyə hazırırq. Bu, həm universitetimizə, həm də kollecimizə aiddi.

Bizə ərizə ilə müraciət edənlərə müsbət cavab veririk. Bu ərizəyə baxdıqdan sonra dekanlığa və banklara müraciət edərək həmin tələbəyə güzət etdiyimizi söyləyirik. Həmişə imkanı olmayan tələbələrə yardım əli uzatmağa çalışırıq.

Digər universitetlərə də məsləhət görürəm ki, tələbələrə güzəşt etsinlər.

Birinci kursda belə çətinliklər olur. Tələbə pulu birinci kursda banka ödəyir. Biz isə o ödənişin çekini Dövlət İmtahan Mərkəzinə təqdim edirik. Bizdə bu məsələdə sərt qayda yoxdu, ərizə ilə hər bir problemi həll edirik”.