Özbəkistan mədəniyyətinin tanınmış simaları Azərbaycan Dövlət Pedoqoji Universitetində tələbələrlə görüş keçiriblər.

 

Eurasia Diary xəbər verir ki, bir neçə gündür ölkəmizdə qonaq olan Özbəkistan mədəniyyətinin tanınmış simaları Azərbaycan Dövlət Pedoqoji Universitetində tələbələrlə görüş keçiriblər. Paralel olaraq, tədbirdə görkəmli alim, professor Babaxan Şərifin 70 illik yubileyi qeyd olunub.

 

Tədbiri giriş sözü ilə universitetin rektoru Cəfər Cəfərov açdı. O, qonaqları və iştirakçıları salamladı. Daha sonra rektor qonaqları iştirakçılara təqdim etdi:" Bizim bu salonda görkəmli şəxsiyyətlərlə tez-tez görüşümüz olur. Bu gün xüsusi bir gündür. Çünki özbək mədəniyyəti ilə daha yaxından tanış olmaq imkanı əldə etmişik. Bu gənclər ölkəmizin gələcəyidir. Onların hansı nuru necə alacağından çox şey asılıdır. Siz tələbləri salamlayıram".

 

Daha sonra söz millət vəkili Qənirə Paşayeva verildi: "Özbəkistan qardaş ölkədir. Orada yaşayanlar da bizimkilərdir. Bir müddət öncə orada səfərdə oldum. Deyirdim ki, öz vətənimdən vətənimə gəlmişəm. Sizlər də öz vətəninizdən vətəninizə gəlmisiniz. Bu universitetdə olmaqdan məmnunam. Cəfər müəllim, sizə təşəkkür edirik. Bu ali məktəbin nüfuzunu daha da artırdınız. Allah uğurlarınızı daha da çox etsin. Müəllimlik ən müqəddəs , şərəfli peşədir. Siz müəllimləri salamlayıram. Əziz gənclər, bizim üçün Azərbaycandan şərəfli heç nə yoxdur. Müstəqilliyimiz bizim üçün çox önəmlidir. 10 milyon üçün deyil, 50 milyondan çox insan üçün Azərbaycan böyük önəm daşıyır. Biz dünyada çoxuq. Biz bir olsaq, daha güclü olarıq. O zaman türk dövlətləri yarananda birliyimizi daha yaxından hiss edirdik. Vaxtı ilə problemlərimiz yarananda türk dövlətləri birlikdə olsaydılar, bu problemləri yaşamazadıq. Şükürlər olsun ki, bu günə gəlib çıxdıq. İnanıram ki, birliyimiz daha da möhkəmlənəcək. Sadəcə, bu birliyin altını doldurmaq lazımdır. Bu toplantını çox önəmli hesab edirəm. Çünki gələcəyimiz sizlərsiniz".

 

Deputat Azərbaycan-Özbəkistan münasıbətlərindən də danışdı: "Dünyanın yüzdə 80 faiz dövlətində olmuşam. Özbəkistandan gözəlini görməmişəm. Qardaş dövlətləri görməyə çalışın öncəliklə can atın. Azərbaycan-Türkiyə, Azərbaycan-Özbəkistan münasibətlərinin artmasl türk dünyası üçün çox vacibdir. Sevincimizi, kədərimizi bölüşməliyik. Gənclər, siz bizdən daha vacib missiyanı daşıdığınızı unutmayın. Öncəliklə yaxşı oxumaq əsas missiyanız olmalıdır. Bu bizim üçün çox önəmlidir. Evimdə və ofisimizdə qədimdən indiyə qədər olan xəritələrimizi saxlayıram. Sizlər də belə edin. Bu sizə güc verəcək. Yaxud da bir şəhidin fotosunu evinizdən asın və hər gün onun gözlərinin içinə baxın. O gözlər sizə çox şeyi deyəcək. "Maşın-Şou"ya baxan gənc nə düşünə bilər? Bu verilişin nə önəmi var? Hələ bilmirəm ki, o veriliş nə deməkdir. Biri əlini qoydu, digəri götürdü, anlamı var? Türk dünyasından bəhs edən filmlərə, seriallara baxın. O zaman o dövlətləri daha yaxından öyrənəcəksiniz. Bu tədbirdən çıxanda bu barədə yaxşı düşünün. Siz çox şeyi dəyişə bilərsiniz. Hər birimiz üçün ən böyük arzu işğal altında olan torpaqlarımızın azad edilməsidir. Xankəndinə bayraq asmağımız da türk dünyasının birliyindən keçir. Babaxan Şərifin yubileyini sonda bir daha təbrik edirəm. Hər birinizə təşəkkür edirəm".

 

B.Şərif çıxışında bunları dedi: "Dərs saatlarını qoyub burada iştirak edən sizlərə təşəkkür edirəm. Cəmiyyətin iki gözü var, müəllim və yazar. Vətəni, milləti sevməyi bizə müəllim öyrədir. Əgər müəllim yoxdursa, millət yoxdur. Müəllimləri sayğı ilə anmaqdan qürur duyuram. Ulu Nizami, Füzuli, Nəsimi, Nəvai kimilər bizə nə verib? İlk olaraq türk ruhunu verib. Tarixini və ədəbiyyatını hər bir insan bilməlidir. Qardaşlar arasında hər zaman problemlər yarana bilər. Ortada sevgi varsa, bu problemlər aradan qalxır. Azərbaycan-Özbəkistan münasibətləri belədir. Bütün sahələr üzrə münasibətlırimiz çox yaxşıdır.

 

Çox danışa bilərəm. Hər birinizi bağrıma basmaq istəyirəm, amma mümkün deyil. Onun üçün də bayrağınızı öpürəm".

B.Şərifin bayrağımızı öpməsi zalda gur alqışlarla qarşılandı. Daha sonra qonaq "Azərbahavca-özbəkcə" və "Özbəkcə-Azərbaycanca" lüğəti APU rektoruna təqdim etdi.

 

Ardınca söz "Kitab dünyası" qəzetinin baş redaktoru Xasiyət Rüstəmə verildi. O, hər kəsi salamladı və Q.Paşayeva başda olmaqla hər kəsə təşəkkür etdi.

 

Tarix institutunun fəxri doktoru Şöhrət Barlas müəllimlərin hər bir xalq üçün olan önəminə xüsusi yer ayırdı.

Daşkənddəki Heydər Əliyev adına Mədəniyyət Mərkəzinin rəhbəri Samir Abbasov dedi:" Bu gözəl tədbirimizin təşkili çox yerinə düşdü. Çünki önəmli tarixi günlər ərəfəsinə təsadüf edir. Son 3 gündə olduqca önəmli tədbirlər keçirdik. Onların hər biri möhtəşəm idi. Bu tədbirlərdə tarixi layihələrə imza atdıq. İki ölkənin dilindən ibarət 30 min söz olan lüğət tərtib etdik. Bu tarixdə ilk idi. Nizaminin "Xəmsə"si özbək dilinə tərcümə edildi və bununla bağlı da böyük bir tədbir keçirdik. Mən Nizamini ədəbiyyatımızın zirvəsi hesab edirəm. Ölkələrarası əlaqələrə gəldikdə, bu əlaqələrdən qürurlanırıq. Özbəkistan Əmir Teymurun ölkəsidir. Hər daşında tarix yatır. Hər birinizi Özbəkistanla əlaqələrə önəm verməyə çağırıram. Dost dar gündə tanınar. Özbəklər belədir. Gələcəyimiz olan soz gənclər qarşısında çıxış etməkdən qürur duyuram. Cənab rektor, sizə də təşəkkür edirik. Rəhbərliyiniz altında bu universitet çox inkişaf edib. Azərbaycan-Özbəkistanın gələcəyinin gözəl, abad, müstəqil görməyi arzu edirəm:"

 

Atatürk mərkəzinin şöbə müdiri Əkbər Qoşalı da çıxış edərək, Azərbaycanın yenidən Özbəkistan, türk dünyası abı-havasına girdiyini söylədi:" Bura ən çox çıxış üçün çıxmaqda məqsədim bayrağımızı öpən Babaxan Şərifin əllərindən öpməkdir".

Ə.Qoşalının bu sözləri və yubilyarın əllərindən öpməsi zalı alqışlara bürüdü.

 

Digər çıxışçılar da Azərbaycan-Özbəkistan münasibətlərinin hər iki ölkə , xüsusilə, türk dünyası üçün vacibliyindən söz açdılar.

 

Sonda qonaqlar təltif edildi, tələbələr qonaqlara gül dəstləri verdilər.