Beynəlxalq münasibətlər üzrə israilli ekspert Arye Qut CBC kanalında "Xüsusi buraxılış" verlişində aparıcı Anastasiya Lavrinanın qonağı olub.

 

Ekspert Dağlıq Qarabağ münaqişəsi ətrafında baş verən son hadisələr barədə danışıb. Müzakirə zamanı Arye Qut ilk növbədə Azərbaycan Ordusunun göstərdiyi şücaəti qeyd edib.

 

Onun sözlərinə görə, Ermənistan döyüş meydanında necə bir düşmənlə qarşılaşdığını başa düşdü və bu gün bizim (xarici ekspertlər) gördüklərimiz Azərbaycan Prezidentinin Ermənistanın hərbi-siyasi rəhbərliyinə əsl dərs verdiyini göstərir.

 

O, qeyd etdi ki, bu gün Azərbaycan nə 90-cı illərdəki kimi deyil, nə də ermənilərin təsəvvür etdiyi Azərbaycan deyil.

 

"Ölkənin bu gün həyata keçirdiyi bütün islahatlar bizə Azərbaycanın həqiqətən necə bir orduya sahib olduğunu və necə silahlandığını göstərdi".

 

Arye Qut əlavə etdi ki, Azərbaycan Ordusu ən yüksək texnoloji silahlardan istifadə edərək Ermənistan tərəfinə kimin kim olduğunu göstərdi:

 

"Azərbaycan Ordusunun döyüş meydanındakı bu üstünlüyü onu göstərir ki, erməni qoşunlarının orada heç bir işi yoxdur, işğala son qoyuldu və artıq getməlidir".

 

İsrailli ekspert Azərbaycanla İsrail arasındakı qardaşlıq münasibətlərinə də toxunub.

 

O, İsrailin Azərbaycana yardım etməyə hazır olduğunu və döyüş meydanında onu dəstəklədiyini söyləyib: “Azərbaycan əsgərinin İsrail silahlarına ehtiyacı varsa, onu alacaq”. Arye Qut, bu əlaqələrin 27 ildir ki, qurulduğunu və Yəhudi xalqının bunu yüksək qiymətləndirdiyini söyləyib.

 

Bəzi ərazilərin işğaldan azad edilməsindən danışan Arye Qut, bu bölgələrdə olduğunu və bunun onun üçün böyük tarixi önəm daşıdığını qeyd edib. O, bu şəraiti yaratdığı üçün Beynəlxalq Avrasiya Mətbuat Fondunun (BAMF) prezidenti Umud Mirzəyevə təşəkkürünü bildirib.

 

Ekspert Umud Mirzəyevlə birlikdə İsrail jurnalistləri də daxil olmaqla bir neçə xarici jurnalistlə Aşağı Əbdürrəhmanlı kəndini ziyarət etdiyini qeyd edib.

 

"Bu, Ermənistan təcavüzü nəticəsində dağılmış kəndlərin kədərli və qəddar mənzərəsi idi: dağıdılmış evlər, məktəblər, uşaq bağçaları və sadəcə yandırılmış torpaq", Qut əlavə edib.

 

Arye Qut Umud Mirzəyevin ona öz evini, valideynlərinin evini, oxuduğu məktəbi göstərərək erməni təcavüzü barədə danışdığını söyləyib.

 

"Dağıdılan bu evlərə baxdım, qəbiristanlıqlar və məzar daşları da dağıdılmışdı ... Bu, erməni işğalçılarının Azərbaycan xalqına qarşı bəslədiyi nifrət və qorxudan xəbər verir", Qut deyib.

 

Verliş zamanı Arye Qut belə bir sual səsləndirib:

 

“İnsana bu həyatda nə lazımdır? Birlikdə yaşamaq, qonşu ilə dostluq etmək olardı, ancaq yox, onlar Azərbaycan ərazilərini işğal etmək üçün hər şeyi etdilər. Bu gün bu torpaqların Azərbaycan Ordusu tərəfindən işğaldan azad edilməsi prosesini və bu vəziyyətdə İsrail və Türkiyə kimi dostları tərəfindən Azərbaycanın dəstəkləndiyini görürük”.

 

Sonda, Arye Qut, Umud Mirzəyevin doğma kəndinin azad olunması xəbərini eşitdiyinə görə çox sevindiyini, bununla əlaqədar Azərbaycan xalqını və xüsusən də Mirzəyevi təbrik etdiyini vurğulayıb.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary