Azərbaycan Respublikası Qaçqınların və Məcburi Köçkünlərin İşləri üzrə Dövlət Komitəsi şanlı Qələbəyə həsr olunmuş “Zəfər arzuları” adlı sosial aksiya təşkil edib.
EDNews.net-in məlumatına görə, Dövlət Komitəsinin sədr müavini Fuad Hüseynov bildirib ki, ötən ilin payızında təcavüzkar Ermənistanın təxribatlarına cavab olaraq Azərbaycan Ordusunun həyata keçirdiyi “Dəmir yumruq” əks-həmlə döyüş əməliyyatları nəticəsində torpaqlarımız işğaldan azad edilib, ölkəmizin ərazi bütövlüyü bərpa olunub və məcburi köçkünlərin doğma yurdlarına qayıtması üçün şərait yaranıb: “Sosial aksiyanın keçirilməsinin məqsədi Vətən Müharibəsində qazanılan möhtəşəm Zəfərin mühüm amillərindən olan birlik və həmrəyliyimizi bir daha nümayiş etdirmək, xalqımıza qürur və qələbə sevinci yaşadan Prezident, Ali Baş Komandan İlham Əliyevə, qəhrəman Azərbaycan Ordusuna, müharibə veteranlarına minnətdarlığımızı çatdırmaq, şəhidlərimizin ruhu qarşısında bir daha baş əyməkdir”.
Tədbirdə iştirak edən digər şəxslər də möhtəşəm Qələbə ilə bağlı fikir və duyğularını ifadə ediblər. Beynəlxalq Avrasiya Mətbuat Fondunun prezidenti, Azərbaycan Respublikası Qaçqınların və Məcburi Köçkünlərin İşləri üzrə Dövlət Komitəsi yanında İctimai Şuranın üzvü Umud Mirzəyev 44 gün ərzində yazılan şanlı tarix barədə danışıb. O qeyd edib ki, 30 il ərzində üz qarasına, ayaqlarımızda buxova çevrilmiş bir problemi Azərbaycan xalqının, dövlətin, ordunun həmrəyliyiyi sayəsində həll edilib.
Tədbirdə tanınmış mədəniyyət və incəsənət xadimləri, ziyalılar, şəhid ailələrinin üzvləri, müharibə veteranları, ictimai fəallar və adi vətəndaşlar iştirak ediblər. Onlar yumruq formasında hazırlanmış stendin üzərinə yapışdırılan kiçik ölçülü standart kağız parçalarına Zəfər arzularını yazıblar. Nəticədə, stendin üzərində Azərbaycan bayrağı fonunda “Dəmir yumruq” təsviri yaranıb.
