“Ümumiyyətlə, İslam dinində nəzir qutusu, nəzirvermə anlayışları yoxdur. Ola bilsin ki, insanlar dini başa düşmürlər. Nəzirvermə anlayışını hansı dindən götürüblər?! Əgər dinləri İslamdırsa, İslamda nəzir, nəzirvermə anlayışı mövcud deyil. Dinləri xristiandırsa, gedib kilsədə şam yandırmalıdırlar. Dualarını etdikdən sonra qayıdıb evlərinə gəlməlidirlər".
Ednews xəbər verir ki, bu fikirləri Millət vəkili Fazil Mustafa öz facebook hesabında yazıb.
Deputat bu sözlərlə dində nəzir pullarının yığılmasına qarşı etirazını bildirib.
"Hətta duanın özündə də hər hansı bir maddi tələb yoxdur. Əlini göyə qaldırmadan da ürəyində Allaha dua edə bilərsən.. Bəs, bu nə dinidir?! Cahil insanların 100, 200, 500 ildir başlarını yeyib aldadıblar ki, sən nəzir verməlisən. Niyə verməlidirlər?!”
Millət vəkili onu da qeyd edib ki, müasir dövrdə ianə forması var və ianənin verilməsinin məqsədi məscidlərin, insanların ibadət yerlərinin işıqpulu, qazpulu problemlərini həll etmək üçündür.
Fazil Mustafa insanların ziyarətgahları və din adamlarının qəbrini ziyarət etdiyi təqdirdə işlərinin həll olunacağını ummasını cəhalət elementi kimi qiymətləndirib.
“İnsanlar Allahla müqavilə bağlayırlar ki, bu işim həll olunsun, qurban kəsəcəyəm. Bu cür absurd məsələnin qanunvericiliyə gətirilməsini də məqbul saymıram. Ümumiyyətlə, bu cür terminlərin qanunvericiliyə gətirilməsinin tərəfdarı deyiləm. “Nəzir qutusu” ifadəsinin özü tamamilə yanlışdır.”-deyə millət vəkili bildirib.
