Bu gün Tərtər rayonunda mina partlayışı nəticəsində iki nəfərin xəsarət aldığı barədə xəbər vermişdik.
Bəzən insanların ehtiyatsızlıqları və məlumatsızlıqları onların həyatlarını, sağlamlıqlarını təhlükəyə atır və doğmalarına acı yaşadır. Çox təəssüflər olsun ki, bu gün Tərtərdə baş verən hadisə də bu fikirləri bir daha sübut edib.
ANAMA yanında İctimai Şuranın sədri Umud Mirzəyev baş verən hadisə ilə bağlı Ednews-a danışarkən vətəndaşlarımızı daha diqqətli olmağa çağırıb. O, təkcə keçmiş cəbhəyanı bölgələrdə yaşayan sakinlərin deyil, o cümlədən işğaldan azad olunmuş ərazilərdə çalışanların da mina təhlükəsizliyi üzrə maariflənməli olduğunu vurğulayıb.
“Ümumiyyətlə, həmin ərazilərdə çalışan şəxslərin məlumatlanması artırılmadan fəaliyyətlərinə icazə verilməsi düzgün deyil və bu fəaliyyətlərin aparılması aidiyyatı qurumların və ANAMA-nın mütəxəssislərinin rəyi əsasında həyata keçirilə bilər. Bu gün iki vətəndaşımız ehtiyatsızlıq səbəbindən mina partlayışı zamanı xəsarət alıb. İstənilən halda insanların mina təhlükəsini bildirən nişanlanmış ərazilərdən dərhal uzaqlaşmaları tövsiyyə olunur", - deyə Umud Mirzəyev bildirib.
Qeyd edək ki, BAMF-ın təşkilatçılığı ilə “Partlayıcı Sursatların Təhlükəsinə dair Maarifləndirmə” (PSTM) layihəsi çərçivəsində maarifləndirmə tədbirləri Tərtər, Bərdə, Füzuli, Göygöl, Goranboy və Daşkəsəndə həyata keçirilir. Layihə qeyd olunan 6 rayon və hər birində 10 min insan olmaqla, ümumilikdə 48 icma sakinini əhatə edir. Regionda aparılacaq maarifləndirmə tədbirləri mina və partlamamış silah-sursat təhlükəsi riskinin azaldılmasında önəmli rol oynayacaq.
***
Tərtər Rayon Prokurorluğu mina partlaması hadisəsi ilə bağlı məlumat yayıb.
Ednews-a daxil olan məlumatda deyilir:
"18.02.2022-ci il tarixdə Tərtər rayonunun Çaylı kəndi ərazisində təmir işləri aparan zaman Azərbaycan Avtomobil Yolları Dövlət Agentliyinin (AAYDA) əməkdaşları 1963-cü il təvəllüdlü Alışah Səfərov və 1965-ci il təvəllüdlü Faiq Səfərov mina partlayışı nəticəsində müxtəlif dərəcəli bədən xəsarətləri alıblar.
Tərtər Rayon Mərkəzi Xəstəxanasından bildirilib ki, mina partlayışı nəticəsində xəsarət alan şəxslərdən birinə ilkin tibb yardım yardım göstərilib və evə buraxılıb. Qeyd olunub ki, digər şəxsin vəziyyəti isə kafi olaraq qiymətləndirilir, hazırda həkim müşayiəti altındadır.
Qeyd edək ki, Prokurorluq əməkdaşları tərəfindən hadisə yerinə baxış keçirilib, məhkəmə-tibb ekspertizası təyin edilib, digər prosessual hərəkətlər yerinə yetirilib.
Faktla bağlı Tərtər Rayon Prokurorluğunda araşdırma aparılır".
***
Bu gün Tərtər rayonunda mina partlayışı nəticəsində iki nəfər xəsarət alıb.
Ednews xəbər verir ki, bu barədə Azərbaycan Respublikasının Minatəmizləmə Agentliyindən (ANAMA) məlumat verilib.
Bildirilib ki, partlayış minatəmizləmə əməliyyatlarının icra edilmədiyi ərazidə baş verib. Belə ki, 1963-cü il təvəllüdlü Alışan Səfərov Şərif oğlu və 1965-ci il təvəllüdlü Faiq Səfərov İsmayıl oğlu mina partlayışı nəticəsində müxtəlif dərəcəli bədən xəsarətləri alıblar.
Zərərçəkənlər dərhal xəstəxanaya çatdırılıb və həkim nəzarətinə götürülüblər. Onların 42 saylı Yol istismar idarəsinin əməkdaşları olduğu müəyyən edilib.
Faktla bağlı müvafiq qurumlar tərəfindən araşdırma aparılır.
