Üçüncü dərəcəli əlilliyi olan Eminov Mahir haqqı olan əlillik müavinətini ala bilmir.
Bu barədə Ednews-a şikayətində şəxsin həyat yoldaşı Eminova Samirə bildirib. Onun sözlərinə görə, yoldaşı Eminov Mahir Maarif oğlunun ayağında anadangəlmə düzdaban xəstəliyi olduğu üçün ona III dərəcəli əlilik statusu verilib.
Ancaq buna baxmayaraq, yoldaşı əlilliyə görə heç bir müavinət almır.
Ayağında olan problemə görə, heç yerdə çalışmayan Mahir Eminov ona əlillik müavinətinin verilməsini istəyir.
Məsələ ilə bağlı Əmək və Əhalinin Sosial Müdafiə Nazirliyindən (ƏƏSMN) verilən məlumata görə Eminov Mahir Maarif oğlunun adı əlillik altsistemində yoxdur. Qurumun Dövlət Tibbi Sosial Ekspertiza və Reabilitasiya Agentliyinə İctimaiyyətlə əlaqələr şöbəsinin müdiri Tural Qurbanov bu kimi halların yaşanmaması üçün əlilliklə bağlı müraciətin hansı formada aparılması prosesinə aydınlıq gətirdi.
“Hər bir vətəndaş bilməlidir ki, ölkəmizdə əlilliyin qiymətləndirilməsi elektron formada yəni “Əlillik” altsistemi üzərindən, tibb müəssisəsinin e-sistemə daxil etdiyi göndərişlərdəki məlumatlar əsasında həyata keçirilir. Vətəndaş əlilliyin təyin olunması üçün yalnız səhiyyə müəssisəsinə müraciət edir. Səhiyyə müəssisi əlilliyin qiymətləndirilməsi üçün FORMA-88 adlı göndərişi elektron sistemə daxil edir. Bundan sonra göndərişdəki fərdi məlumatlar sistem tərəfindən adsızlaşdırılır. Sonra yalnız göndərişdəki tibbi məlumatlar əsasında ekspert-vətəndaş kontaktı olmadan, əlillik təyin edilib-edilməməsinə dair qərar qəbul edilir. Əlillik təyin edildikdə bu barədə məlumat sosial təminat orqanına göndərilir.
Əlilliyin təyin edilməsi və ya edilməməsi həmçinin bunun səbəbi barədə məlumat vətəndaşın telefonuna SMS vasitəsilə göndərilir. Səhiyyə müəsisəsi tərəfindən göndəriş natamam doldurulduqda müayinə və müalicələr dair sənədlər daxil edilmədikdə əlillik təyinatından imtina edilir. Nəticəni həmçinin e-sosial.az, E-gov.az portallarından və 142 çağrı mərkəzindən öyrənmək olar”.
Məlum olduğu kimi əlillik statusu almaq istəyən şəxs ilk növbədə səhiyyə müəsisəsinə müraciət etməlidir. Müavinət məsələsi isə tibbi məlumatlar əsasında məlum olur.
Ləman Abbaslı
