Həbsxana və ana və uşaq...
Bunu təsəvvürdə belə canlandırmaq ağırdır. Canlı şahidi olmaqsa insana daha çox əzab verir. Yaxşı, qadınlar da cinayət işləyir və məhbus olur amma...
Bəs uşaqlar? Günahsız dediyimiz uşaqların cəzaçəkmə müəssisəsində nə işi var?
2 yaş yeddi aylıq olan Nicat bağçada həmyaşıdlarıyla oynamalı olduğu halda anası ilə birlikdə həbsxana həyatını yaşamağa məhkumdur. Narkotik vasitənin satışına görə saxlanılan Rəmziyyə Abbasova Nicata elə hamilə ikən məhkəmə zalından həbs olunub. Elə Nicat da dünyaya gözlərini dəmir barmaqlıqlar arasında açıb. Çox təssüf ki, o, dünyaya gələndə artıq azadlıqdan məhrum edilib.
Hazırda ana – bala qadın və yetkinlik yaşına çatmayan məhkumlar üçün yeni inşa edilən 4 saylı cəzaçəkmə müəssisəsində həyatlarını davam etdirir.
“Qaydalara görə, 3 yaşında uşaqlar həbsxananı tərk etməlidir. Beş aydan sonra mənim oğlum da buranı tərk etməlidir. Amma Nicatı verəcək bir kəsim yoxdur. Bir anam vardı o da iki ay bundan əvvəl rəhmətə getdi. Uşaqla yalnız qalmışam (kövrəlir) Bu vəziyyətdə məcburən Nicatı uşaq evinə təslim edəcəm.
O, törətdiyi əmələ görə çox peşman olduğunu deyir...
“Narkotik vasitənin satışı ilə məşğul idim. Cəza müddətim 5 il 6 aydır. 3 il 3 aydı ki, buradayam”, -deyə, məhkum ana bildirib.
Rəmziyyə deyir ki, bu həyatda heç kəsdən dəstəyi yoxdur. Həbs edildikdən sonra həyat yoldaşı ilə də ayrılıb. Səbəbini demədi, vəfasızlıqdı, deyilmi bilmədim, amma nə də olsa ortada uşaq var idi axı...
Nicatdan başqa 17 yaşında qız övladı da var, Rəmziyyənin.
“Qızım anamla qalırdı. O rəhmətə gedəndən sonra Şəmkirdə evdə tək qalır. Orta məktəbi bitirib. 2 il 3 aydı ki, qızımı görmürəm, imkan yoxdur deyə gələ bilmir (kövrəlir)”.
Yeni inşa edilən cəzaçəkmə müəssisəsini ana öz balaca oğlu ilə evləri kimi qəbul edir.
“Burada şərait çox yaxşıdı, sağolsunlar, hər şey yaxşıya doğrudu, amma...
Adicə bura köçüb gələndə uşaq pəncərədən baxıb: “Ay ana, maşınlara bax! Evə gedirik?”(kövrəlir) Elə bilir ki, bura bizim evimizdi. Buranı hələ ki, evim kimi qəbul edirəm. 2 il 4 ay qalıb cəzamın bitməsinə, uşaq gedəndən sonra 2 ilim qalacaq”.
Həbsdən öncə Rusiyada işlədiyini söyləyən Rəmziyyə azadlığa çıxandan sonra ölkəni tərk edəcəyini deyir.
“Novruz Bayramını heç kimsiz tək keçirdik. Qapıya baxırdım, ümid edirdim ki, bəlkə oradan bizi görmək üçün kimsə daxil olar...(kövrəlir). Bura bir məktəbdir. Allah heç kəsin yolunu həbsxanaya salmasın!”
Gülnar Səlimova