“Kim bir orucluya iftar verərsə, həmin şəxs qədər savab qazanar”- deyirlər. İslam dininin müsəlmanlara tövsiyyə etdiyi qaydaların biri də ehtiyacı olanlara yardım etməkdir. Ramazan ayı da məhz bununçün gözəldir. Bu ayın ən gözəl tərəfi insanların ac qalmaqla toxluğun qədrini bilməsi, onları anlamasıdır. Hər zaman iftar süfrəsi evdə, restoranda və ya digər qapalı yerlərdə açılır. Amma hazırda danışacağımız iftar süfrəsi tamam başqa yerdə, köşkdə qurulub.
20 yanvar metrosunun ərazisində yerləşən bu köşk hər axşam evə tələsən oruc tutanların duasına səbəb olur. Köşkün satısıcı Məhəmməd deyir ki, iftar süfrəsi qurmaq ona mənəvi rahatlıq, xüsusi zövq verir.
Beləliklə, Məhəmmədlə maraqlı söhbətimiz başlayır.
- Sözün düzü, köşkləri belə görmək bizə qeyri adi gəlir. Burada iftar süfrəsi qurmaq ideyası haradanyarandı? Necə oldu ki, belə bir qərar verdiz?
- Mən daima insanları müşahidə edirdim. Görürdüm ki, iftar üçün işdən çıxıb evə tələsənlər var. Ancaq tıxaclar və pik saatlar olduğu üçün çox adam vaxtında iftarını aça bilmir. Düşündüm ki, yol kənarı belə süfrə olsa insanlar ən azından vaxtında iftarlarını açarlar. Bu fikri rəhbərimə bildirəndə niyyətimi çox xoş qarşıladı. Qeyd edim ki, bu aksiyanı müdriyyətin ayırdığı büdcə ilə edirəm. Mən bu savab işdə sadəcə vasitəçiyəm. Hər iftar vaxtı o süfrəni qurmaq özü mənə zövq verir. Əziyyəti də mənə çox xoşdur.
- Bu, həqiqətən də çox təqdirəlayiq addımdır. Maraqlıdır, iftar açan insanların sizə qarşı münasibətləri necədir? Bunun üçün sizə təşəkkür, dua edirlər?
- Çox müsbət. Onlar üçün oruclarını məhz bu süfrədəki naz-nemətlərlə açmaq isə ayrı gözəl hissdir. Onların mənə qarşı olan hisslərini sözlə ifadə edə bilmirəm. Əvvəl bu süfrəni açanda mənə dedilər ki, insanlar süfrəyə əl uzatmağa utanacaqlar. Ancaq mən belə olmayacağını hiss edirdim. Çünki inanırdım ki, oruc tutan insanlar bunun adi deyil, Allah süfrəsi olduğunu başa düşəcəklər və ora düzülən təamları halallıqla istifadə edəcəklər.
- Siz, həqiqətən də böyük savab iş görürsüz. İslam dinində bizə tövsiyyə olunan kimi ac insanları doyuzdurursunuz. Sonda bu cür aksiyaların daha geniş yayılması üçün digər köşk sahiblərinə nə demək istərdiniz?
- Burada mənim nəsə deməyimə ehtiyac yoxdur, zənnimcə belə işlərin sayı nə qədər çox olsa, bir o qədər də yaxşıdır. Çünki Allah qarşısında bir faiz iş görmək böyük şeydir. Onun xoşbəxtliyini heçnə vermir.
-Təşəkkür edirəm, Allah hər zaman yolunuzu açıq etsin!
- Sağ olun.
Ləman Abbaslı