Cəlil Xəlilov: “Biz yaxın gələcəkdə hər iki dövlətin QHT-ləri arasında əməkdaşlığın yeni müstəviyə keçdiyinə şahid olacağıq”
Xəbər verdiyimiz kimi, Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin təşkilatçılığı ilə 2022-ci il “Şuşa ili” çərçivəsində ilk dəfə olaraq Azərbaycan – Türkiyə Qeyri-Hökumət Təşkilatlarının Əməkdaşlıq Forumu keçirilib. Forum çərçivəsində Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi və Türkiyə Respublikasının Daxili İşlər Nazirliyi arasında “Birgə Fəaliyyət və Əməkdaşlıq haqqında Anlaşma Memorandum”u imzalanıb.
Ednews xəbər verir ki, bu tarixi Forumla bağlı veteran.gov.az-a açıqlama verən Müharibə, Əmək və Silahlı Qüvvələr Veteranları Təşkilatının sədr müavini, polkovnik Cəlil Xəlilov məlum Forum və Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi və Türkiyə Respublikasının Daxili İşlər Nazirliyi arasında imzalanan “Birgə Fəaliyyət və Əməkdaşlıq haqqında Anlaşma Memorandum”un mühüm əhəmiyyətə malik olduğunu bildirib:
“Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin təşkilatçılığı ilə 2022-ci il “Şuşa ili” çərçivəsində ilk dəfə olaraq Azərbaycan – Türkiyə Qeyri-Hökumət Təşkilatlarının Əməkdaşlıq Forumu keçirilməsi olduqca mühüm bir hadisədir. Bu Forum Azərbaycan və qardaş Türkiyənin vətəndaş cəmiyyəti institutları arasındakı əməkdaşlığın genişlənməsinə, bu əməkdaşlığın mahiyyət etibari ilə yeni mərhələyə daxil olmasına mühüm töhfə verəcək.
Forum çərçivəsində Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi və Türkiyə Respublikasının Daxili İşlər Nazirliyi arasında “Birgə Fəaliyyət və Əməkdaşlıq haqqında Anlaşma Memorandum”u imzalandı ki, bu Memorandum tərəflər arasındakı əməkdaşlığın konkret istiqamətlər üzrə inkişaf etdirilməsini nəzərdə tutur.
Hesab edirəm ki, bu Forum Azərbaycan və Türkiyənin vətəndaş cəmiyyətləri institutları arasında əməkdaşlığın inkişafına ciddi təkan verməklə yanaşı, iki qardaş dövlət arasında münasibətlərin digər müstəvilərdə də inkişafına öz töhfəsini verəcək.
Digər mühüm bir məqam Azərbaycan və Türkiyənin belə bir Forum keçirməklə bütün dünyaya növbəti dəfə öz birlik və həmrəyliklərini nümayiş etdirməsi ilə bağlıdır. Bildiyiniz kimi, tarixin bütün dönəmlərdə Azərbaycan və Türkiyə bir-birlərinin yanında olub, dar məqamda bir-birlərinə dəstək veriblər. Bunun son örnəyi 44 günlük Vəətn müharibəsi oldu. Hansı ki, bu müharibədə qardaş Türkiyə Azərbaycana həm diplomatik, həm də mənəvi baxımdan böyük dəstək verdi, onunla həmrəylik nümayiş etdirdi. Azərbaycan da bütün beynəlxalq platformalarda qardaş Türkiyəyə dəstək verməkdədir. Bu baxımdan Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin təşkilatçılığı ilə 2022-ci il “Şuşa ili” çərçivəsində ilk dəfə olaraq Azərbaycan – Türkiyə Qeyri-Hökumət Təşkilatlarının Əməkdaşlıq Forumunun keçirilməsini əlamətdar hadisə hesab edirəm.
Forumun təşkilatçılığını yüksək səviyyədə həyata keçirdiyi üçün Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinə də öz təşəkkürümü bildirir, fəaliyyətlərində uğurlar arzulayıram”.
