Xəbər verdiyimiz kimi, ötən gün İstanbulun Fatih bölgəsində iki qrup arasında silahlı insident nəticəsində 1-i polis olmaqla, 7 nəfər yaralanıb və yaralananlar arasında Türkiyədə yaşayan azərbaycanlı aktyor Kamran Dadaşzadə də olub. 

 

Baş nahiyəsindən güllə yarası alan azərbaycanlı aktyor K.Dadaşzadə xəstəxanaya çatdırılsa da, onun həyatını xilas etmək mümkün olmayıb.

 

Ednews xəbər verir ki, Kamran Dadaşzadənin dostu, İsveçdə yaşayan yazıçı Elçin Aslangil Bizim.Media ilə mərhum aktyorla bağlı sarsıntılarını bölüşüb: 

 

“Onunla 2017-ci ildə İstanbulda tanış olmuşduq. Eyni bir tamaşada rol almalı idik. Birgə məşqimiz zamanı onun necə istedadlı olduğunu gördüm, dostluğumuz yarandı. Həqiqətən o çox istedadlı bir aktyor idi, çox gözəl səhnə plastikası vardı”.

 

Kamranın iş dalınca Türkiyəyə yollanmasına gəlincə isə Aslangil bunu yerli teatrlardakı problemlərlə əlaqələndirib:

 

“Bu Azərbaycan teatrının problemidir ki, orada müəyyən insanlar tərəfindən istedadlı aktyorlar incidilir və ya arxa plana keçirilir. Xüsusilə də teatrda aldığı məbləğin az olduğu üçün Kmaran Dadaşzadə İstanbula üz tutdu. O, öz Vətənini çox sevirdi, əgər normal işi olsaydı bu dəhşətli faciə də baş verməzdi”.

 

Kamranın Türkiyədəki karierası haqqında da fikir bildirən sənət dostu onun bəzən işsiz qaldığı məqamlara da diqqət çəkib:

 

“Kamran elə də rahat həyat yaşamayıb. Oradakı fəaliyyəti müddətində bəzən seriallara çəkilir, bəzən də işsiz qalırdı. Seriallardan qazandığı məbləğlər sayəsində işsiz olduğu məqamlarda da müəyyən qədər keçinirdi. Amma Kamran heç zaman həyatdan ümidini üzməyən, mərhəmətli və kifayət qədər həssas bir insan idi”.

 

Qeyd edək ki, K.Dadaşzadə 1969-cu ildə Sumqayıtda anadan olub. Sumqayıt Dövlət Dram Teatrının aktyoru olub. Türkiyədəki aktyorluq fəaliyyəti müddətində “Kurtlar Vadisi”, “Savaşçı”, “Kardeş Payı” kimi seriallarda yadda qalan obrazlar canlandırıb. Həmçinin 2018-ci ildə yayımlanan “Servet” serialında rol alıb.

 

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary