Dünyada 10 həftəlik buğda ehtiyatının qalması barəd həyacan təbili çalınıb.

 

Ednews xəbər verir ki, bu barədə mayın 26-da BMT Təhlükəsizlik Şurasında qida təhlükəsizliyi üzrə ekspert Sara Menker bildirib. O, qeyd edib ki, hazırda dünyada buğda qıtlığı gözlənilir. Sara Menker bildirib ki,  Ukraynadakı müharibə və Hindistanın son həftələrdə buğda ixracına qadağa qoyması səbəbindən dünyada anbarlarda cəmi 10 həftəlik buğda qalıb. 

 

Məlumdur ki, Ukrayna və Rusiya əsas buğda ixrac edən ölkələrdəndir. 2020-ci ilin statistikasına əsasən, Ukrayna buğda ixracına görə dünyada 5-ci, Rusiya isə 1-ci yerdə qərarlaşıb. Müharibənin hələ də bitməməsi hər iki dövləti rezervlərini qorumaq istiqamətində addım atmağa vadar edib. Bu səbəbdən onlar ixrac edilən məhsullara limit qoyublar. Bu limitlər də idxalçı ölkələrdə bahalaşma ilə özünü göstərir. 

 

Ukrayna və Rusiyanın ardından Hindistan da buğda ilə bağlı qərar verib. Belə ki, mayın əvvəlində hökümət buğda ixracını qadağan edib. Belə bir qərar dünyada buğda qiymətlərinin qəfil artması fonunda daxili qiymətlərin artımına nəzarət tədbirləri çərçivəsində qəbul edilib. Qeyd edək ki, Hindistan dünyanın ikinci ən böyük buğda istehsalçısıdır.

 

Buğda ixracatçılarının qadağalarının Azərbaycana necə təsir edəcəyi sual doğurur. Araşdırmalara görə, 2022-ci ilin yanvar-fevral aylarında Rusiyadan Azərbaycana gətirilən buğdanın qiyməti 9,2 dəfə, həcmi isə 6,7 dəfə artıb. Lakin təhlilçilər bildiriblər ki, Azərbaycanın Rusiyadan buğda asılılığı olsa da, ölkədə taxılla bağlı hər hansı qıtlıq və yeni bahalaşma gözlənilmir.

 

Məsələ ilə bağlı Ednews-a danışan Milli Məclisin İqtisadi siyasət, sənaye və sahibkarlıq komitəsinin üzvü, deputat Vahid Əhmədov bildirib ki, ölkələrin əksəriyyəti qıtlığa hazırlıqlıdır:

 

“Dünyada yaşanan ərzaq qıtlığının arxasında dayanan ən böyük səbəblərdən biri Ukrayna-Rusiya müharibəsidir. Hər iki ölkə taxıl, buğda ixrac edən ölkələrdir. Müharibə nəticəsində onlar məhsulların ixracına limit qoyaraq əhalinin güzəranını qorumaq istəyirlər. Lakin bu da həmin ölkələrdən məhsul alan dövlətlərə problem yaradır. Lakin yenə də dövlətlərin bu prosesə hazırlıqlı olduğunu düşünürəm. Məsələn, Çində ərzaq məhsulları, buğda ehtiyatı kifayət qədərdir. Pakistanda da vəziyyət normaldır”.

 

Deputat Azərbaycanın buğda qıtlığına hazırlıqlı olduğunu vurğulayıb:

 

“Prezident İlham Əliyevin apardığı siyasət nəticəsində ölkəmizin ehtiyatları kifayət qədərdir. Ona görə də, Azərbaycanın ərzaq və buğda qıtlığından əziyyət çəkməyəcək. Dövlətimizin kifayət qədər ehtiyatı var. Özümüz də kifayət qədər taxıl, buğda istehsal edirik. Həmçinin dost ölkə Pakistan da ehtiyac olduğu təqdirdə Azərbaycana taxıl verməyə hazır olduğunu bir neçə dəfə bildirib”.

 

Xanlar Əlibəy

 

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary