Deputat Fazil Mustafa ölkədə dərmanların keyfiyyətinin çox aşağı olmasından danışıb. Parlamentin plenar iclası zamanı bu haqda məsələ qaldıran deputat dərmanlarla bağlı əhali arasında böyük narazılıqların olduğunu da vurğulayıb.
Məsələ ilə bağlı Ednews-a danışan Məclisin Əmək və Sosial siyasət komitəsinin sədri Musa Quliyev bildirib ki, o da səfələrlə bu problemi gündəmə gətirməyə çalışıb.
“Dərmanların keyfiyyətinin yüksək olması əhalinin sağlamlığı üçün vacibdir. Ona görə də, bu məsələyə xüsusi diqqət ayırmalıyıq. Keyfiyyətli dərman şirkətləri məhsullarını bizə satmaqda maraqlı deyillər. Çünki onların satdıqları məhsullar baha olur. Bu vəziyyət də əhaliyə sərf etmir. Türkiyə ilə Azərbaycanın dərman sənayesini birləşdirərək bu problemi həll edə bilərik. Türkiyə istehsalı dərman məhsulları həm keyfiyyətlidir, həm də sərfəlidir”.
Deputat bir çox dərmanın ölkəmizdə istehsal edilməyinin vacibliyini qeyd edib:
“Azərbaycanda dərman istehsalı üçün ciddi addımlar atılmalıdır. Ölkəmizdə dərman istehsalı xalqımıza da sərfəli olar. Pirallahıda dərman istehsalı zavodunun tikilməsi üçün yer ayrılsa da, ortada heç nə yoxdur. Prezident İlham Əliyev də həmin zavodun açılışında iştirak edərək ölkədə dərman istehsalının vacibliyini vurğulayıb. Ümumiyyətlə, ölkəyə idxal edilən dərmanlar barəsində ətraflı məlumat öyrənə bilmirik. Səhiyyə Nazirliyi hər dəfə iddia edir ki, gətirilən bütün dərmanlar standartlara uyğundur. Amma həkimə gedərkən onlar bizə dərmanları Türkiyədən almağımızı tövsiyə edirlər. Deməli, idxal edilən dərmanların keyfiyyəti şübhə altındadır”.
Tibb elmləri doktoru, professor Adil Qeybullanın fikrincə isə ölkəyə idxal edilən dərmanlar barəsində məlumatın ictimaiyyətə şəffaf şəkildə təqdim olunmalı olduğunu vurğulayıb:
“Ölkəyə gətirilən dərmanlar barəsində ətraflı məlumat paylaşılmalıdır. Hər kəs bilməlidir ki, məhsul hansı ölkədən, firmadan idxal olunur. Hətta məsuliyyəti kimin daşıdığı da bilinməlidir. Monopoliya aradan qaldırılsa, problem daha tez həll olunar. Həmçinin dövlət farmakopiyası yaradılmalıdır. Dərman maddələrinin dövlət reyestrinin də formalaşdırılması vacibdir. Eyni zamanda, azad rəqabət mühiti yaradılsa, keyfiyyətli dərmanların sayı artar. Burada xeyli infrastruktur yaradılmalıdır”.
Xanlar Əlibəy
