İyul ayının 15-dən etibarən Milli Məclisin deputatları tətilə çıxır.
Deputatlara məzuniyyət dövründə müalicə olunması və istirahət etməsi üçün onların iki aylıq vəzifə maaşı məbləğində müavinət verilir.
Ednews deputatlar və partiya liderlərinin harada və necə dincələcəkləri ilə bağlı sorğu keçirib.
Millət vəkili Zahid Oruc tətili ölkəmizdə keçirməyi planlaşdırdığını deyir. Onun sözlərinə görə pandemiyaya qədərki dövrdə də prinsipləri belə olub.
“Xüsusi olaraq, hansısa xarici ölkəyə uyğunlaşmaq, onu uzun illər ərzində həyatımızın ayrılmaz bir hissəsinə çevirmək kimi bir ənənəm olmayıb. Hesab edirəm ki, Azərbaycan coğrafiyası istənilən bir insanın həddindən artıq çətin, məsuliyyətli işindən müəyyən günlər ayırıb istirahət edə bilməyə yetərincə imkan verir. Yaxşı dincəlmədən yaxşı çalışmaq mümkün deyil. Bu çox qısa bir müddəti əhatə edə bilər. Çünki parlament tətilə çıxandan sonra bu şəraiti biz yalnız avqustda qısa bir müddət üçün əldə edirik”.
Deputat Vahid Əhmədov isə qeyd edib ki, məzuniyyətinin bir hissəsini Bakıda keçirəcək. Ancaq mütəmadi olaraq Qubaya da səfər edəcək.
Millət vəkili Məlahət İbrahimqızının sözlərinə görə, o, iyunun 15-dən sonra yay tətilini Bakıda və Azərbaycanın digər guşələrində keçirəcək.
Deputat Azər Badamov da tətili ölkə daxilində keçirməyi planlaşdırır.
“Əsasən seçildiyim və doğulduğum Qusar rayonunda olacam. Ora gözəl təbiəti olan bir rayondur, istirahət mərkəzləri də kifayət qədər var. Ancaq imkan olsa, ölkəmizin digər regionlarında da istirahət etməyi düşünürəm. Çünki Azərbaycanın çox gözəl istirahət məkanları, gözəl təbiəti, hər bir rayonun özünün turizm potensialı var. Hər birimiz bunları görüb təbiətin qoynunda istirahət etməliyik”.
Azərbaycan Xalq Partiyasının sədri Pənah Hüseyn istirahət etməyi düşünmədiyini deyib.
“Hələ ki, belə anlayışım və təsəvvürüm yoxdur. Biz avqustun 20-də partiyanın qurultayını keçirəcəyik, ona hazırlaşıram”.
Müasir Müsavat Partiyasının sədri Hafiz Hacıyev səhhətilə bağlı yaranan problemə görə istirahət edə bilmədiyini bildirdi.
“Bildiyiniz kimi koronavirusa yoluxduqdan sonra ürəyimdə problemlər yaranıb, əməliyyat olmuşam. Müalicə üçün ayda bir-iki dəfə Ankarada oluram. Oradan təzə gəlmişəm, yaxın günlərdə yenə ora qayıdacam. Hansısa sanatoriya və ya istirahət müəssisəsində dincəlmək imkanım yoxdur”.
Azərbaycan Demokrat Partiyasının sədri Sərdar Cəlaloğlu yay tətili zamanı heç yerə getməyəcəyini, evdə ailəsilə bir yerdə olacağını söyləyib.
Ağ Partiyanın sədri Tural Abbaslı isə istirahət barədə arzularla reallığın əslində üst-üstə düşmədiyindən gileylənib.
“Ümumiyyətlə tibbi və psixoloji baxımdan insanlar ildə bir dəfə ən azı bir müddətlik məzuniyyətə çıxmalıdır, amma Azərbaycan cəmiyyətinin buna elə də imkanı yoxdur. Ən yaxşı halda öz rayonumuz Ağstafa, Qazaxa gedib bir həftə, on gün qala bilsəm, hansı ki, bu mümkün deyil, istirahət etmək istəyərəm. Amma təəssüf ki, Azərbaycan əhalisinin 90 faizi bu gün 20-30 gün sözün həqiqi mənasında istirahət edə biləcək vəziyyətdə deyil, eləcə də xalqın partiyası olduğumuz üçün də biz. Amma təbii ki, Havay adalarında istirahət etmək istərdik (gülür)”.
Gülnar Səlimova