İllərdir Bakı şəhərində yaşayan Cəfərova Məhəbbət özünəməxsus evi olmadığı və kirayədə yaşadığı üçün 2000-ci ildən etibarən Sabunçu rayon 13 nömrəli polis idarəsində qeydiyyatda olub. Lakin bu yaxınlarda oradan qeydiyyatdan çıxarıldığını öyrənib. 

Bu barədə Ednews-a danışan şikayətçi hazırki vəziyyətdə nə edəcəyini bilmir. 

“Əvvəl Bakıxanovda yaşayırdım. Evi satdıqdan sonra kirayə yaşadım. İllərdir Sabunçu rayon polis idarəsində qeydiyyatda idim. 

Bu yaxınlarda işlədiyim qurumdan mənə heç bir yerdə qeydiyyatda olmadığımı və sistemdə adımın çıxmadığını bildirdilər. Məsələ ilə bağlı ASAN xidmətə müraciət etdim. Oradan da qeydiyyatımın silindiyini bildirdilər”. 

Heç bir xəbərdarlıq olunmadan qeydiyyatdan çıxarıldığını deyən qadın nə edəcəyini bilmədiyini və “havada asılı qaldığını“ deyir.

Şikayətçinin sözlərinə görə, əvvəllər qeydiyyatda olduğu Sabunçu rayon 13-cü polis bölməsinə qeydiyyatı barədə müraciət etsə də, ona “qanun var, ona görə də biz səni qeydiyyatdan çıxarmışıq” deyə bildiriblər. Hətta ona hansısa qohumunun evinə qeydiyyata düşməsi haqqında tövsiyyələr veriblər. Lakin Bakıda heç bir qohumu olmayan qadın indi çox çıxılmaz vəziyyətdə qaldığını bildirir.

“Hazırda çox pis vəziyyətdəyəm, bütün sənəd işlərim yarımçıq qalıb. Qeydiyyatım olmadığı üçün sənədlərimlə bağlı heç bir işimi icra edə bilmirəm. Polis bölməsi ASAN-a, ora isə həll yolunun polis bölməsində olduğunu deyir”.

Məsələ ilə bağlı Sabunçu rayon 13 nömrəli polis şöbəsinə müraciət etsək də heç bir məlumat ala bilmədik. Bölmədən Ednews-a verilən məlumata görə vətəndaş məsələnin həlli üçün adıçəkilən şöbəyə müraciət etməlidir. 

“Həmin şəxs yalnız idarəyə yaxınlaşmalıdır, telefonla heç bir məlumat vermirik. Artıq sonrakı prosesləri qeydiyyat şöbəsi tərəfindən aparılır”.

Daşınmaz əmlak və inşaat üzrə ekspert Elnur Azadov vətəndaşın  müəyyən dövrdən sonra şəxsiyyət vəsiqəsinin etibarlığı itirdiyini bildirib. O, Ednews-a açıqlaması zamanı çıxış yollarından danışıb.

“ Çıxış yolu ancaq yaxın adamının evinə qeydiyyata düşməkdir. Bundan başqa şəxs kirayə qalırsa o, kirayə müqaviləsi üzərindən qaldığı evə qeydiyyata keçir. Kirayə müqaviləsi olmayan vətəndaşın isə yeganə seçimi qohum-tanışın evinə qeydiyyata düşməkdir”. 

Mövcud vəziyyətin hüquqi tərəfindən danışan vəkil Sahib Məmmədov vətəndaşın yaşayış yerindən xəbərdar edilmədən qeydiyyatdan çıxarılmasının qanunsuzluq adlandırıb. Onun sözlərinə görə,  məsələnin həlli yalnız polisə müraciət etməkdir.

 “Bu problem əsasən 90-cı illərdə aktual idi. Əgər indi belə narazılıq varsa, şəxs əvvəllər qeydiyyatda olduğu yerə müraciət eməli və məsələnin həllinə nail olmalıdır. Yaşayış yeri haqqında məlumat yeni nəsil şəxsiyyət vəsiqəsinin üzərində yazılmasa da qeydiyyat bazasında bu haqqda bilgilər yerləşdirilir. Şəxs isə ilk öncə polisə müraciət edərək problem haqda məlumat verməlidir. Artıq orada bununla bağlı müvafiq tədbirlər görüləcək”.

Ləman Abbaslı