Azərbaycan Respublikası Təhsil Nazirliyi tərəfindən elan edilən "Təhsilin inkişafı üzrə ictimai təşəbbüslərin dəstəklənməsi” qrant müsabiqəsinin qalibi olan Beynəlxalq Avrasiya Mətbuat Fondunun (BAMF) həyata keçirdiyi "Təhsil müəssisələrində tələbələrin sosial fəaliyyəti və inkişafı" layihəsinə yekun vurulub.
Ednews xəbər verir ki, tədbirdə çıxış edən BAMF prezidenti Umud Mirzəyev bildirib ki, qarşıdan gələn ayda təşkilat 30 illik yubileyini qeyd edəcək. O, nitqi zamanı Fondun Birləşmiş Millətlər Təşkilatı (BMT) ilə əlaqələrinə də toxunub.
“BMT ilə 34 mindən çox təşkilat əməkdaşlıq edir. BAMF BMT yanında Əsas məşvərətçi statusu qazanan 136 təşkilatdan biridir. Bu status bizə istənilən vaxt BMT-nin Cenevrə, Nyu-York, Vyana ofislərində tədbirlərə qatılmaq və görüşlər keçirmək imkanı verir. Dekabrın 2-də dünyada “Mina təmizləmə və minalanmış ərazilərin üzümlüyə çevrilməsi” devizi altında fəaliyyət göstərən “Sülhün kökləri” beynəlxalq təşkilatı ilə BMT-nin baş qərargahında həm yubiley tədbiri, həm də “Davamlı İnkişafa və Minasız Dünyaya Yol Açmaqda Vətəndaş Cəmiyyətinin Rolu” adlı tədbir keçiriləcək”.
Umud Mirzəyev həmçinin rəhbəri olduğu təşkilatın Qətərin "Əl-Cəzirə" Media Şəbəkəsi, sosial biznes və “mikrokreditin atası” adlandırılan Məhəmməd Yunus ilə tərəfdaşlıq əlaqələri, eləcə də bir çox nüfuzlu beynəlxalq təşkilatlar və diplomatik korpus nümayəndələri ilə əməkdaşlığından da söz açıb. O, yubiley tədbirləri çərçivəsində BAMF-ın 30 illik fəaliyyətinə həsr olunan kitabın işıq üzü görəcəyini də qeyd edib.
Daha sonra Fondun rəhbəri tələbələrlə səmimi söhbət edib. Tələbələr Beynəlxalq Avrasiya Mətbuat Fondunun fəaliyyəti barədə fikirlərini bölüşüblər.
Sonda layihə boyu aktivliyi ilə seçilən tələbələr sertifikatla təltif olunublar.
Qeyd edək ki, 2022-ci ildə BAMF-ın Azərbaycan Respublikası Təhsil Nazirliyinin dəstəyi ilə həyata keçirdiyi “Təhsil müəssisələrində tələbələrin sosial fəaliyyəti və inkişafı” layihəsi çərçivəsində 10 ali təhsil ocağı (bəzilərində 2 gün), eyni zamanda Beynəlxalq Avrasiya Mətbuat Fondunun mərkəzi ofisində olmaqla 904 tələbəyə 6 mövzu istiqamətində 54 təlim keçilib. Eyni zamanda, telebexidmet.az saytı vasitəsilə BAMF-a müraciət edən və layihə əməkdaşlarının öz təşəbbüsü ilə azərbaycanlı tələbələrlə yanaşı, 14 ölkədən olan xarici tələbələrlə də görüşlər təşkil olunub.
Beynəlxalq Avrasiya Mətbuat Fondunun icra etdiyi layihə çərçivəsində tələbələr üçün 13-20 iyul tarixlərində yay kursları keçilib.
Mükafatlandırılanlar 6 ay davam edən layihə çərçivəsində 10 ali təhsil ocağında təşkil olunmuş təlimlərə qatılan 904 nəfər arasından seçilib. İngilis dilindən təkmilləşdirmə kurslarında iştirak edən tələbələr mütəxəssis Elnur Məmmədlinin dəstəyi ilə dil biliklərini inkişaf etdirmək imkanı qazanıblar.
.jpg)
