"Dünyanın aparıcı dövlətləri sosial şəbəkələri tənzimləmək üçün qanunlar qəbul edirlər. Elə mövzular var ki, onlar üçün xüsusi qanunlar hazırlanır".
Ednews xəbər verir ki, bu fikirləri Jurnalistlərin Həmkarlar İttifaqının sədri Müşfiq Ələsgərli bu gün keçirilən "Media azadlığı və sosial şəbəkələrin güclənən təsiri şəraitində cəmiyyətin informasiya təhlükəsizliyinin təmin olunması" mövzusunda konfransda deyib. Onun sözlərinə görə, dünyada sosial şəbəkələr güc mərkəzi kimi çıxış edirlər:
"Bunun tənzimlənməsi üçün müəyyən tədbirlər görülməlidir və ayrı-ayrı dövlətlər tərəfindən bu edilir. Məsələn, Fransada çoxsaylı məsələlər var ki, onlarla bağlı nifrət çıxışının qarşısının alınması üçün qanun hazırlanıb. Hazırda Almaniya, Polşa, Fransa və digər ölkələrdə bu cür qanunlar hazırlanıb. Sosial şəbəkəni tənzimləyə deyə bir məsələ yoxdur. Ancaq sosial şəbəkələrdə uşaqların hüquqlarının, müəllif və digər hüquqların qorunmasına zərurət var".
Bəs belə bir qanunun Azərbaycanda tərtibi sosial şəbəkələrdə təhlükəsizliyi həqiqətən də tənzimləyəcəkmi?
Təhlükəsizlik eksperti Elmar Nurəliyevin sözlərinə görə, belə layihənin olması təhlükəsizlik baxımından çox önəmli məqamdır.
“Sosial şəbəkənin əlbəttə ki, mənfi, təhlükəli tərəfləri də var. Məqsədi, niyyəti pis olanlar da öz pisliklərini sosial şəbəkələrdə göstərə bilər. Bu da əlbəttə ki, təhlükə deməkdir. Bununla bağlı da qanun layihəsinin olması vacib məqamdır. İstər sosial şəbəkə istifadəçiləri, istər sosial şəbəkə vasitəsilə xoşagəlməz əməllər törədən şəxslər üçün önəmli tənzimlənmə olmalıdır. Cəmiyyət üçün təhlükəli hesab edilən milli, dini ayrıseçkilik, nifrət həmçinin dövlətin milli maraqlarına qarşı çağırışlar birbaşa təhlükəlidir. Belə təhlükənin qarşısının alınması üçün də qanun layihəsi tərtib olunmalıdır. Tez bir zamanda belə qanun tərtib olunarsa əlbəttə ki, nəticəsini görəcəyik”.
Ləman Abbaslı