10-12 oktyabr tarixində Gürcüstan Respublikasının Tbilisi şəhərində Ümumdünya Səhiyyə Təşkilatının Səhiyyədə Fövqəladə Hallar üzrə Cənubi Qafqaz Mərkəzi və Gürcüstan Ölkə Ofisinin birgə təşkilatçılığı ilə “Səhiyyədə fövqəladə hallarda risk kommunikasiyası və icmalarla iş: öyrənilmiş dərslər və gələcəyə baxış” mövzusunda görüş keçirilib.
Ednews xəbər verir ki, Azərbaycan da daxil olmaqla 9 ölkənin təmsilçilərinin iştirak etdiyi görüşün əsas məqsədi COVID-19 pandemiyası dövründə qazanılmış təcrübələrin bölüşülməsi, gələcək prioritetlərin müəyyənləşdirilməsi və risk kommunikasiyası və icma fəaliyyətlərinin daha da yaxşılaşdırılması məqsədilə subregional və ölkə tövsiyələrinin inkişaf etdirilməsi olub.
Görüşdə geniş tərkibdə iştirak edən Azərbaycan nümayəndə heyətinə ÜST-nin Azərbaycan üzrə Ölkə Ofisinin əməkdaşları ilə yanaşı, Azərbaycan Respublikası Səhiyyə Nazirliyi İctimai Səhiyyə və İslahatlar Mərkəzi, İcbari Tibbi Sığorta üzrə Dövlət Agentliyi, Tibbi Ərazi Bölmələrini İdarəetmə Birliyi (TƏBİB), Azərbaycan Könüllü Təşkilatları İttifaqı və “Regional İnkişaf” İctimai Birliyinin təmsilçiləri qatılıb.
Ölkə təcrübələri və yeni tövsiyələr ətrafında səmərəli fikir mübadiləsinin aparıldığı görüşdə aktiv iştirak edən Azərbaycan nümayəndə heyətinin üzvləri COVID-19 ilə mübarizədə risk kommunikasiyasında çoxtərəfli yanaşmanın tətbiqi, pandemiyaya qarşı mübarizədə davranışların qiymətləndirilməsi sorğusunun əhəmiyyəti, gənclər və könüllülərin pandemiya ilə mübarizədə rolu və Operativ Qərargahın cavab tədbirlərini vahid mərkəzdən idarəetməsinin əhəmiyyəti kimi müxtəlif mövzulara dair təqdimatlarla çıxış edib.
Qeyd edək ki, görüş Avropa İttifaqının maliyyələşdirdiyi Sağlamlıq üçün Həmrəylik Təşəbbüsü çərçivəsində həyata keçirilib.
.jpg)
