Bu güm “525”-ci qəzetin 30 illik yubileyi münasibətilə tədbir keçirilib. Tədbir Nizami Gəncəvi adına Ədəbiyyat İnstitutunda baş tutub.
Ednews xəbər verir ki, tədbirdə BDU-nun Jurnalistikanın nəzəriyyəsi və təcrübəsi kafedrasının müdiri Cahangir Məmmədli, AMEA-nın vitse-prezidenti, akademik İsa Həbibbəyli, “Elm və həyat” jurnalının redaktor müavini və AMEA Nizami Gəncəvi adına Ədəbiyyat İnstitutunun baş mütəxəssisi Ülkər Hüseynova, Fəlsəfə elmləri doktoru, Azərbaycan Milli Elmlər Akademiyasının müxbir üzvü Könül Bünyadzadə, sabiq təhsil naziri Misir Mərdanov, filologiya elmləri doktoru Nadir Məmmədli, Əməkdar Elm Xadimi Qəzənfər Paşayev, Tarix elmləri doktoru, professor Abbas Seyidov, "525-ci qəzet”in baş redaktorunun müavini Yusif Rzayev, professor Nurbay Cabbarov, filologiya üzrə elmlər doktoru, ədəbiyyatşünas Teymur Kərimli və digər tanınmış şəxslər, media nümayəndəli iştirak edib.
Tədbir AMEA-nın prezidenti İsa Həbibbəylinin çıxışı ilə başlayıb. O, qeyd edib ki, “525”-ci qəzetin müstəqil dövrümüzdə ən uğurlu mətbuat orqanıdır. “525”-ci qəzet müasir dövrün ədəbi məktəbidir”.
O, həmçinin, qəzetin baş redaktoru Rəşad Məcidi Mətbuat Şurasının yeni sədri seçilməsi münasibəti ilə təbrik edib.
"Müstəqil mətbuat yaradıb inkişaf etdirmək istəyənlər üçün “525”-ci qəzet sözün əsl mənasında canlı nümunədir. Bu qəzet yeganə mətbuat orqanıdır ki, illərdir reallıqları olduğu kimi çatdırmağa nail olub",- deyə İ.Həbibbəyli deyib.
İsa Həbibbəyli, “525”-ci qəzetin müəllifləri barədə də məlumat verib. O, qəzetin müəlliflərinin çoxpalitralı olmasından, bir çox ziyalıları öz ətrafında topladığını qeyd edib.
AMEA-nın həqiqi üzvü Teymur Kərimli “525”-ci qəzetin Azərbaycan mətbuatının yarandığı dövrdən keçdiyi inkişaf dövrlərini və ənənələrini özündə əks etdirdiyini bildirib.
Azərbaycan Mətbuat Şurasının sədri, “525”-ci qəzetin baş redaktoru Rəşad Məcid çıxışı zamanı qəzetin hər zaman öz təmkinli mövqeyini qoruyub saxladığını bildirib. O, “525”-ci qəzetin keçdiyi uzun yoldan da söz açıb. Sədr həmçinin, çıxış edən şəxslərə öz təşəkkürünü bildirib.
"525”-ci qəzetə gələnlər qısa müddətdə bu mətbuat orqanının ab-havasına öyrəşirlər. Bu mənim üçün sevindirici haldır ki, bir çox gənclər məhz bizim qəzetlə əməkdaşlıq edirlər. Gələcək illərdə də, nə qədər texnologiya inkişaf etsə də, “525”-ci qəzet hər daim yaşayacaq".
Cahangir Məmmədli “525”-ci qəzetin onun üçün özəl olduğunu xüsusi vurğulayıb. O, “525”-ci qəzetin ictimailəşdirmə yolunda özünəməxsus rolu olduğunu bildirib. C.Məmmədli, həmçinin qəzetin ətrafında toplaşan jurnalistlərin əksəriyyətinin məhz Bakı Dövlət Universitetinin jurnalistika fakültəsinin yetirmələri olduğunu qeyd edib.
Misir Mərdanov çıxışı zamanı Rəşad Məcidin təsis etdiyi mətbuat orqanının mətbuatdakı əvəzsiz rolundan söz açıb.
Avrasiya Yazarlar Birliyinin başqanı Yaqub Ənvəroğlu “525”-ci qəzetin təkcə Azərbaycanda deyil, eləcə də Türkiyədə oxucularının olduğunu qeyd edib. O, Rəşad Məcidi türk qardaşlığında "xəzinə" adlandırıb.
AMEA adından “525”-ci qəzetin baş redaktoru Rəşad Məcidə "Şuşa qalası" hədiyyəsi təqdim edilib.
Tədbirdə həmçinin “525”-ci qəzetin Azərbaycan Mətbuat tarixində özünəməxsua rolu olduğu vurğulanıb.
Qeyd edək ki, qəzet 1992-ci ildən bəri Azərbaycan Respublikasında nəşr edilir.
Nəzrin Beydiyeva
