“Erasmus+” proqramı çərçivəsində Azərbaycana səfər edən xarici nümayəndələr uzun zaman BAMF-da könüllü kimi çalışan, Portuqaliyadan olan Vitor Mendesin vasitəçiliyi ilə qurumun baş ofisini ziyarət ediblər.

Ednews xəbər verir ki, qonaqları BAMF-ın prezidenti Umud Mirzəyev qarşılayıb. Səmimi mühitdə keçən görüşdə U.Mirzəyev ilk olaraq xarici ziyarətçilərə fondun yarandığı gündən indiyədək keçdiyi fəaliyyət dövründən geniş məlumat verib.  

 

“Sizin gəlişiniz bizim üçün çox xoş oldu. Hər birinizi burada qarşılamaqdan məmnunluq duyuram. İnsanlar bir- birini sevməlidir. Dünyanı sevgi xilas edəcək. 

BAMF postsovet məkanında fəaliyyətinə görə ən böyük təşkilatlardandır. Bizim bu təşkilatdakı əsas missiyamız barış və sülhdür. Biz müharibənin nə olduğunu çox yaxşı bilirik. 

Bu il BAMF 30 illik yubileyini qeyd etdi. Bununla bağlı böyük tədbirimiz oldu. Geriyə baxanda fəaliyyətimizi incələyəndə görürük ki, bu 30 ildə kifayət qədər böyük fəaliyyətimiz olub. Bu illər ərzində Azərbaycan həqiqətlərinin mötəbər tribunalardan, o cümlədən BMT-nin yüksək tribunasından müntəzəm olaraq diqqətə çatdırılması BAMF-ın prioritet məqsədlərindən biri olub.

Bu gün biz Ukraynada baş verən hadisələri üzüntü ilə müşahidə edirik. Hazırda dünyanın 60-a yaxın ölkəsində münaqişə yaşanır. 60 milyondan çox insan öz doğma yurdundan deportasiya olunub”.  

 

 

Umud Mirzəyev xarici nümayəndələrə Qarabağ müharibəsindən, münaqişədən əziyyət çəkən insanlardan da bəhs edib.   

 

“Mən və ailə üzvlərim Qarabağ müharibəsindən zərərçəkmişlərdən olmuşuq. Bizim kimi yüzlərlə insan var. Bir milyondan çox məcburi köçkünümüz öz doğma yurdlarından uzaqda yaşayır. Hazırda işğaldan azad olan Azərbaycanın Qarabağ torpaqlarının ərazisi mina və partlamamış hərbi sursatlarla çirklənib. Biz inanırıq ki, ana yurdumuzda 30 il əvvəki yaşayışımızı təmin edəcəyik”.  

 

 

Xarici nümayəndə heyətinin adından Vitor Mendes  çıxış edərək Umud Mirzəyevə görüş üçün təşəkkürünü bildirib. 

 

“Əzizimiz, Umud Mirzəyev. Biz sizinlə uzun zamandır ki, tanışıq. Siz hər zaman gənclərə dəstək olmusuz, müxtəlif layihələrinizdə onlara yer vermisiniz. Siz burada neçə-neçə xarici tələbələrə atalıq etmisiz, onlara doğma insan olmusuz. BAMF-dan bir çox Vyetnam, Nikaraqua, Fransa, Nigeriya və dünyanın bir çox ölkələrindən olan tələbələrin yolu keçib. Onlar burada müxtəlif layihələrdə çalışıb, təcrübə qazanıblar. Bu insanlar BAMF-da təkcə iş təcrübəsi deyil, sizdən gördükləri doğma münasibətdən həyat təcrübəsi qazanıblar. Onlara doğru yol göstərmisiz. Mən uzun müddət BAMF ailəsində təcrübəçi kimi çalışmışam, bura mənim iş yerim yox, ailəm olub. Siz hər zaman xaricdən gələn tələbələrə qayğı, doğma münasibətlə yanaşmışınız. Onlara maddi, mənəvi köməklik etmisiz. Neçə xarici tələbə sizin dəstəyinizlə özünü Azərbaycanda öz doğma evindəki kimi hiss edib. Onlar indi də sizi hər zaman çox gözəl xatırlayırlar. BAMF hər zaman barış və sülh üçün fəaliyyət göstərib. Onun Beynəlxalq təşkilatlarla əməkdaşlığı buna bir daha sübutdur. Bu təşkilatlarla münasibəti Azərbaycanın haqq səsinin dünyaya çatdırılmasında mühüm rol oynayıb. BAMF öz missiyasını hər zaman layiqincə yerinə yetirib.

Biz sizə öz adımızdan təşəkkür edir və sizə fəaliyyətinizdə uğurlar arzulayırıq”. 

 

 

V.Mendes həmçinin səfərlərinin mahiyyətindən, onun məqsədindən də söz açıb.

 

“Biz bu ölkəyə “Erasmus+” “Azərbaycanda gənclərin iş reallığı” proqramı çərçivəsində səfər edirik. Səfərin əsas məqsədi azərbaycanlı gənclərlə iş əlaqələrini araşdırmaq və gələcək imkanları müzakirə etməkdir. Bu səbəblə bir çox gənclərlə görüşdük, İdman və Gənclər Nazirliyində olduq.

Biz istəyirik ki, Azərbaycandakı gənclərin beynəlxalq əməkdaşlıq imkanlarını artırılmasına yardım edək. Bunun üçün çox maraqlı qarşılıqlı fikir mübadilələrimiz oldu. Həmçinin gənclərlə QHT-lər arasında əlaqələrin qurulmasına da öz töhfəmizi verməyə çalışacağıq”.

 

Daha sonra nümayəndə heyətinə BAMF-ın dəvəti, ANAMA-nın dəstəyi ilə Azərbaycana səfər edən “Sülhün kökləri” təşkilatının qurucusu və rəhbəri Heidi Kuhnün Qarabağda minalanmış ərazilərə səfəri haqqında video çarx nümayiş olunub.

Fondun prezidenti Umud Mirzəyev BAMF-ın 30 illiyinə həsr olunan xatirə kitabını qonaqlara hədiyyə edib.

Sonda xatirə fotosu çəkdirilib.  

 

 

Ayan Rzayeva