Xəbər verdiyimiz kimi, millət vəkili Tamam Cəfərova çıxışı zamanı təklif edib ki, Azərbaycanda uşaqları cinsi istismara məruz qoyanları kastrasiya edilsin. Maraqlıdır ki, qanunvericilikdə belə bir maddə varmı?
“Azərbaycan demokratik hüquqi dünyəvi hunitar respublikadır. Azyaşlıları cinsi istismara məruz qoyanları kastrasiya etmək orta əsrlərdə bu məsələyə son qoyulub”.
Ednews bu barədə hüquqşünas və sosioloqun fikirlərini öyrənib. Cavabları təqdim edirik.
Hüquqşunas Elşad İsayev açıqlamasında bildirdi ki, Azərbaycan Respublikası qanunlarla idarə olunan dövlətdir. Hər bir cinayətin özünəməxsus şəkildə cəzası var.
“Bunu da qanunvericilik müəyyən edir. Azyaşlılara qarşı cinsi istismar çox ikrah doğuran dəhşətli hadisədir. Daha dəhşətli cinayətlər var, məsələn, uşaqları doğrayıb öldürənlər var. Burada qanunvericilik ömürlük azadlıqdan məhrumetmə cəzası nəzərdə tutur. Ümumiyyətlə insan bədəninin müxtəlif nahiyələrinə xəsarət yetirilməsi ilə bağlı Cinayət Məcəlləsində belə maddə yoxdur. Bu mümkün olan bir cəza deyil”.
O, həmçinin qeyd edib ki, Azərbaycan Respublikası Avropa Birliyinin, BMT-nin üzvüdür və bir sıra öhdəlikləri var.
“Bu cəzanın təklif olunması tamamilə qanunsuz və əsassızdır. Təklif oluna bilər ki, azyaşlı uşaqlara qarşı cinsi istismara yol verən şəxslər barəsində tətbiq olunan cəza tədbirləri sərtləşdirilsin və azadlıqdan məhrum olunma cəzası artırılsın”.
Sosioloq Lalə Mehralı isə qeyd etdi ki, bu mövzu neçə dəfə müzakirə olunub. Amma, təəssüf ki, buna qarşı alternativ bir variant tapa bilmirlər.
“Xatırlayıram ki, deputat Qüdrət Həsənquliyev bu barədə təklif vermişdi. Bu proses üçün ya cərrahi əməliyyat, ya da xüsusi dərmanlar vasitəsi ilə baş tutur. Amma inanmıram ki, ölkədə bu işə qol qoysunlar. Təbii ki, hamımızın istəyi odur ki, bu cinayətkarlara qarşı bir tədbir görülsün. Bu gün demokratiya ilə öyünən Avropada belə bir qanun varsa bizdə niyə olmasın”.
Onun sözlərinə görə bu ölkələrin bir çoxunda seksual manyaklar ya ömürlük həbs cəzası ilə, ya da kastrasiya edilir.
“Bu cinayətkarlara seçim kimi təklif olunur. Düşünürəm ki, bu mövzu daha çox müzakirə olunmalıdır ki, gündəmdə qalsın”.
Ayan Rzayeva
