Azərbaycanda dini tolerantlıq mövcud olsa da, buna bir çox hallarda aqressiv yanaşanlar da olur. Daha çox sosial şəbəkələrdə açıq və ya anonim rəy formasında dərc olunan yazılarda ilahi varlıq və din əleyhinə, hətta təhqiramiz ifadələr də yer alır.
Azərbaycan islam ölkələri arasında ən liberal və bütün dini inanclara tolerant yanaşan ölkə kimi tanınır. Halbuki son zamanlar facebook və instagram kimi sosial şəbəkələrədə yayılan bu kimi hallar inanclı insanlar arasında narahatlıq yaradıb və hətta ciddi münaqişələrin yaranmasına səbəb olub.
Məsələ ilə bağlı hüquqşünas Əsabəli Mustafayev Ednews-a açıqlama verib.
İlk növbədə qanunlar haqda danışan hüquqşünas, Azərbaycan konstitusiyasında dini inancların təhqir olunması və ya əksinə olan halların tənzimlənməsi ilə bağlı hər hansı bir maddənin olmadığını deyib.
“Azərbaycan qanununda dini azadlıq və onun pozulmasına qarşı sanksiyalar nəzərdə tutan xüsusi maddələr var. Lakin bu maddələr yalnız hökumət qurumları və hakimiyyət orqanlarını nəzərdə tutur. Cəmiyyətdə isə fərdi şəxslərə qarşı belə bir qanun mövcud deyil”.
Əsabəli Musayev bildirib ki, əgər bu cür qanun qəbul edilərsə bu, ölkədə qarşıdurmanın meydana gəlməsinə yol aça bilər.
“Bəzən sosial şəbəkələrdə ictimaiyyət arasında tanınan şəxslər daha çox bu cür hallara yol verir, onlar xüsusilə siyasətlə dini səhv salaraq ifrat dərəcədə din əleyhinə fikirlər səsləndirirlər. Məsələn, İran rejimi və ya Ərəb ölkələrinin Azərbaycanla olan mövqeyi dinlə qarışdırılmamalıdır. Əfsuslar olsun ki, bu cəmiyyətimizdə mövcud olan acı bir həqiqətdir.
Onu da əlavə edim ki, dinlə bağlı fərdi şəxslər məsuliyyətə cəlb edilərsə bu cəmiyyətimizdə güclü qarşıdurmaya gətib çıxara bilər. Çünki belə olan halda dindən istifadə edən qüvvələr cəmiyyət arasında təxribatçı fiqurları işə sala bilər”.
Ə.Mustafayevin sözlərinə görə, bu gün sosial şəbəkələrdə baş verənlərin qarşısının alınması üçün cəmiyyətdə qanun qəbul etməkdən çox maarifləndirmə işlərinə üstünlük verilməlidir.
O bildirib ki, bu cür maarifləndirmə işləri həm də dini mövqe bildirmədən mətbuat vasitəsilə də həyata keçirilə bilər.
Elnur Ənvəroğlu