90-cı illərdən etibarən sürətlə böyüyən, kütləvi köçlər qəbul edən Bakının tıxac problemi gündəlik həyatımıza ən çox təsir edən məsələlərdən biridir. Paytaxt tıxac, dayanacaq və ictimai nəqliyyatdakı sıxlıqdan əziyyət çəkir. Metroların, avtobusların qələbəliyi sakinləri mənzil başına aparmaqda xeyli çətinliklər törədir. Maşın sayı da günü-gündən artmaqdadır. Üstəlik rayonlardan şəhərə üz tutan insan sayı da çoxalmaqda davam edir.

2022-ci ildə Azərbaycanda minik avtomobillərin sayı 1 milyon 349 minə çatıb. Ümumi avtomobillərin sayı isə 1.7 milyondur. Ötən il ölkəyə 84 min 765 minik avtomobili idxal olunub. Bu ilin ilk 9 ayında isə sahibkarlar Azərbaycana 45 min 519 avtomobil gətirib.

Bunun çıxış yolları varmı? Tıxacdan, stressedən uzaq həyat Bakıya da üz tutacaqmı?

Ednews bu barədə nəqliyyat üzrə ekspert Ərşad Hüseynovun fikirlərini öyrənib. O, qeyd edib ki, paytaxtın ictimai nəqliyyatının bel sütunu olan avtobuslarla sərnişin daşıma çox ciddi iqtisadi, texniki və təşkilati böhran yaşayır:

“Belə davam etsə, dövlətin ciddi dəstəyi və müdaxiləsi olmasa, bu sektorun çöküşü çox uzaqda deyil. Taksi aqreqatorları "hər kəsi ucuz qiymətə biz daşıyacağıq" devizini açıq səsləndirirlər. İlk baxışdan cazibədar, lakin Bakı kimi iri şəhərdə reallıqdan uzaq olan bu ideya son illərdə taksi minik avtomobillərinin sayının dəfələrlə artmasına gətirib çıxarıb".

Onun sözlərinə görə, ictimai nəqliyyatla qane olmayan, çox vaxt ona əli çatmayan və "ucuz taksi" şüarının keçici olduğunu bilən insanlar bütün imkanlarını səfərbər edərək fərdi avtomobil əldə etməkdədirlər:

"Köhnə, bəzən yarasız avtomobil sahibləri isə ondan bərk-bərk yapışıblar ki, yollarda qalmasınlar. Əslində fərdi avtomobillərin artması qorxulu deyil, çünki bu, firavanlıq, maddi rifahın yüksək olması deməkdir (inkişaf etmiş ölkələrdə belədir). Amma bizim dərdimiz odur ki, fərdi avtomobil nəinki ailənin, hətta bəzən qohum-qonşunun yeganə yerdəyişmə vasitəsi olur. Bu səbəbdən az qala hər kəsin avtomobili hər gün küçədə olur”.

Oğuz Ayvaz