Kəskin hava şəraiti bir çox sahələrdə olduğu kimi ictimai nəqliyyatda da bəzi çətinliklər yaradıb.

Hazırda Bakı yollarında vəziyyət necədir?

Bakı Nəqliyyat Agentliyinin (BNA) mətbuat katibi Mais Ağayevin Ednews-a verdiyi məlumata görə, hazırda paytaxtda müşahidə edilən hava şəraiti ilə əlaqədar müntəzəm marşrut xətləri üzrə avtobusların normal və fasiləsiz fəaliyyətini təmin etmək, eləcə də yarana biləcək problemlərin vaxtında aradan qaldırılması məqsədilə zəruri tədbirlər həyata keçirilir.

“Əvvəlcədən görülən tədbirlər sayəsində səhər saatlarında bütün müntəzəm marşrut xətləri üzrə avtobusların reysə çıxışı təmin edilib. Müntəzəm marşrut xətləri üzrə avtobusların fəaliyyətinə nəzarət artırılıb. Bu məqsədlə Agentliyin mobil qrupları Nəqliyyat mübadilə Mərkəzlərinin və şəhərin müxtəlif ərazilərində xidmət aparır”.

Vahid Dispetçer Xidmətinin bu gün səhər pik saatlarında olan məlumatına əsasən paytaxtın müxtəlif ərazilərində müşahidə olunan nəqliyyat sıxlıqları səbəbindən 54 müntəzəm marşrut xətti üzrə 188 avtobusun hərəkət intervalında gecikmələr var.

Həmçinin bildirilir ki, paytaxtın aşağıda qeyd olunan ərazilərində müntəzəm marşrut xətləri üzrə avtobusların hərəkətində müəyyən çətinliklər müşahidə olunur.

Belə ki, çətinliklər əsasən Yeni Yasamal Əsəd Əhmədov küçəsi, “ Günəşli” qəsəbəsi D massivi, Biləcəri dairəsi, Xocahəsən dairəsindən Moskva prospekti istiqamətində, 9-cu mikrarayon ərazisində müşahidə edilir.

Aynurə İsmayılqızı