“Azərbaycanda orta məktəblərdə dini maarifləndirmənin aparılaması məqsədəuyğun olardı”.
Bu sözləri Ednews-a açıqlamasında din xadimi Haci Şahin ölkəmizdə dini mövhumatın qarşısının alınması ilə bağlı fikirlərini bölüşərkən bildirib.
Söhbət zamanı Hacı Şahin qeyd edib ki, dini maarifləndirmə bir sıra istiqamətlərdə aparılmalıdır.
“Ümumiyyətlə, Azərbaycanda din ilə bağlı maarifləndirmə tədbirləri görülür. İstər məscidlərdə, istərsə informasiya vasitələrində dini mövzular ilə bağlı məlumatar verilir. Hesab edirəm ki, dini maarifləndirmənin səviyyəsinin artırılması üçün ilk növbədə dini tədris mərkəzləri açılmalıdır və dini tədris edən insanların peşəkarlığına xüsusi önəm verilməlidir. Düzgün dini biliklərə sahib olan yeni nəslin formalaşmasına ehtiyac var. Bu istiqamətdə Azərbaycanda İlahiyyət Universiteti dini maariflənməyə yönələn dərslər tədris eləyir, yeni din xadimləri yetişdirir. Yalnız düzgün və doğru addımların atılması insanlarımızı dini xürafatdan və mövhumatdan qoruya bilər”.
Hacı Şahin orta məktəblərdə dini dərslərin tədris edilməsini məqsəduyğun hesab edib.
“Orta məktəblərdə ümumibəşər dinlər haqqında məlumatlar verilməlidir. Bu gün gənclərimizə dini məlumatlar verməsək, onlarda din barəsində düzgün təsəvvürlər formalaşdırmasaq, o zaman onlar gələcəkdə radikal dini qruplaşmalara qoşula bilərlər. Bunun qarşısının alınması üçün orta məktəblərdə şagirdlər mütləq dinlə bağlı maariflənməlidirlər. Sadəcə bunun elmi bazasının formalaşması lazımdır. Həmin dərsləri tədris edən şəxslərin hazırlanması zaman aparan məsələdir. Məktəblərdə belə bir təcrübənin tətbiq ediməsinin tərəfdarıyam”.
Yunis Abdullayev