Yanvarın 17-də Bakı Avrasiya Universitetinin akt zalında 20 Yanvar hadisələrinin 33-cü ildünümünə həsr olunan tədbir keçirilib.

Ednews xəbər verir ki, BAAU-nun Ərəbşünaslıq Mərkəzinin təşkilatçılığı ilə keçirilən anım mərasimi “20 Yanvar hadisələri ərəbdilli mediada” adı altında təşkil olunub.

Tədbiri giriş sözü ilə açan BAAU-nun Beynəlxalq Əlaqələr üzrə prorektoru, dosent Səyavuş Qasımov 20 Yanvar faciəsinin törədilməsini şərtləndirən səbəblərdən danışaraq onun mediada əks etdirilməsi və doğurduğu rezonansı iştirakçıların diqqətinə çatdırıb. O deyib ki, Azərbaycan xalqını dəhşət və müsibətə düçar etmiş 20 Yanvar faciəsi bütün dünyada əks-səda doğurub, mütərəqqi qüvvələrin qəzəb və hiddətinə səbəb olub. Buna görə də hadisə baş verən vaxtı bir çox ölkələrin radiostansiyaları, mətbuatı yanvar faciəsi haqqında informasiya verir və onun təşkilatçılarını, icraçılarını qınayırdı. Azərbaycana dost ərəb ölkələri də bu hadisələr vaxtı və ondan sonra da ölkəmizin haqq səsinin çatdırılmasına bizimlə əməkdaşlıq edirdilər.

AzərTAC-ın “Ərəb dilində informasiya” bölməsinin müdiri Şıxəli Əliyev 20 yanvar hadisələrinin ərəb mediasında işıqlandırılması ilə bağlı geniş məruzə ilə çıxış edib. Şıxəli Əliyev daha sonra bildirib ki, ermənilər ərəb medasında 20 yanvar, Xocalı faciəsi ilə bağlı dərc olunmuş foto şəkilləri özlərinin başına gələn hadisə kimi təqdim etməyə və ictimaiyyəti çaşdırmağa çalışırlar.

Tədbirdə iştirak edən tələbələr ərəb mediasında 20 Yanvarla bağlı çap edilən bəzi məlumat və informasiyaları səsləndiriblər.