Xəbər verdiyimiz kimi Tarif Şurasının qərarı ilə fevralın 3-dən ictimai nəqliyyatın qiyməti bahalaşacaq. Qiymət artımı daha çox tələbələrə çətinlik yaradır. Qeyd edək ki, cari ilin yanvarın 13-dən tələbə təqaüdləri artırılıb.
Bəs, artım tələbələrə hansı çətinlikləri yaradır?
Tələbə Samirə Mustafayeva bildirir ki, təqaüdlərin artması onları sevindirsə də, gediş haqlarının bahalaşması onlar üçün xoşagəlməz olub.
“Bu maddi cəhətdən tələbələrə kömək olacaqdı. Bu gün isə ictimai nəqliyyatın qiymətinin artması təqaüdlərin qiymətinin artdığını hiss etdirmədi”.
Tural İsrafilli isə deyir ki, hesablamalarına görə o, nəqliyyatdan ancaq ayın 10 günü istifadə edə biləcək.
“Təqaüdün məbləğindən yol pulum ancaq ayın 10 gününə bəs edəcək. Ondan sonra məcburam ki, hər gün universitetə qədər olan kilometrlərlə yolu piyada gedib-gəlim”
İqtisadçı-ekspert Əkrəm Həsənov bildirib ki, pensiyaları, təqaüdləri maaşları artıranda bir müddətdən sonra ictimai nəqliyyatın da qiymətində artıracağı bəlli idi .
“Düşünürəm ki, bahalaşma bir çox sahələrdə özünü biruzə verəcək. Tarif Şurası bundan sonra bir sıra qiymət artımlarını həyata keçirə bilər. Bu zərərin qarşısını necə almaq olar?
Yəqin ki, ən doğru cavab təqaüdləri bir daha artırmaq olar. Amma bu çox çətin məsələdir. Burada zərər görən təkcə tələbələr deyil. Sadəcə tələbələr daha az müdafiə olunan təbəqələrdən biridir. Tələbələr hər gün ictimai nəqliyyatdan istifadə edirlər”.
O həmçinin qeyd edib ki,tələbələrə ictimai nəqliyyatda müəyyən güzəştlər tətbiq olunmalıdır.
“Amma bunun inzibatçılığlı çətin məsələdir. Bu güzəşti tətbiq etməmək üçün başqalarının da bu kartlardan istifadə edəcəyini əsas gətirə bilərlər. Amma hər bir halda tələbələrə güzəştlər tətbiq olunması yaxşı olar”.
Ayan Rzayeva