Xəbər verdiyimiz kimi, ictimai nəqliyyatın qiymətində artım olub. Qiymət artımı daha çox tələbələrə təsir göstərib. Məsələn, qonşu ölkələrdə tələbələrə özəl güzəştli kartlar mövcuddur. Bəs bizim ölkədə tələbələrə güzəştli kartların tətbiqi olacaqmı?
Məsələ ilə bağlı Ednews-a açıqlamasında nəqliyyat eksperti Aslan Əsədov bildirib ki, tələbələrə olan güzəştlər dünyanın inkişaf etmiş ölkələrinin piroritet məsələlərindən biridir.
“Hər ölkədə bu prosses müxtəlif cür aparılır. Bəzi ölkələrdə müəyyən güzəştlər tətbiq olunur. Bəzilərində isə ümumiyyətlə pulsuz ictimai nəqliyyatdan istifadə haqqı verilir. Bizim ölkədə bu məsələ nə qədər müzakirəyə qaldırılsa da hələ bir nailiyyət əldə olunnmayıb”.
O qeyd edib ki, əgər bütün tələbələrə pulsuz ictimai nəqliyyatdan istifadəni tətbiq etmək çətindirsə heç olmasa bölgələrdə olan tələbələrə bu güzəşti yarada bilərlər.
“Məsələn həftə içi univeristetə gedən tələbələr ödənişsiz yararlana bilsinlər”.
Deputat Naqif Həmzəyevin sözlərinə görə, bu məsələ ilə bağlı Milli Məclisdə dəfələrlə təkliflər vermişik.
“Nazirlər Kabineti müvafiq hesab etdikləri vaxtda bu cür güzəştli tariflər tətbiq edə bilərlər. Bu güzəştlər təkcə tələbələrə deyil, eyni zamanda şagirdlərə və şəhid ailələrinə də tətbiq oluna bilər. Çünki əvvələr bəzi problemlər var idi. Amma bu gün Vahid kart sistemi var. Onlayn rejimdə bunu tətbiq etmək mümkündür”.
Deputatın fikrincə bununla bağlı həm də beynəlxalq təcrübə də var.
“Bu güzəşti tətbiq etsələr düşünürəm ki, ictimai nəqliyyatdan istifadə edənlərin sayı artar. Nəticədə şəxsi avtomobillərin sayıı azalar. Bu da tıxacların olmamasına gətirib çıxarar. Bu cür güzəştlərin olunması arzuolunandır. Biz təklif edirik. Qərarların qəbul olunmasında isə aidiyyatı qurumlardan asılıdır”.
İqtisadçı Eyyub Kərimlinin sözlərinə görə isə, bu güzəştlər bizim ölkədə də tətbiq olunmalıdır.
“Təkcə tələbələrə deyil, həm də sosial rifahı aşağı olan təbəqələrə,təqaüdçülərə tətbiq etmək olar. Hesab edirəm ki, burada ictimai nəqliyyat da , şirkətlər də gəlirlərini itirməyəcəklər. Əksinə daimi müştərilərin sayının çoxalmasına səbəb olacaq. Bu da onların işlərinin təkmilləşdirilməsinə və gəlirlərin sabitləşməsinə müsbət təsir göstərəcək”.
Ayan Rzayeva