Azərbaycanda şirin su problemi getdikcə daha geniş vüsət alır. İçməli su ehtiyatlarının tükənməsi gələcəkdə xoşagəlməz nəticələrə səbəb ola bilər.
Ednews xəbər verir ki, su ehtiyatlarının azalmasının qarşısını almaq və içməli sudan qənaətlə istifadəni təmin etmək məqsədilə Bakı ətrafı qəsəbə və kəndlərdə suyun verilməsi qrafiklərində dəyişikliklər ediləcək.
Məsələ ilə bağlı “AzərSu” ASC-nin mətbuat katibi Anar Cəbrayıllı Ednews-a açıqlamasında bildirib ki, dəyişikliyin məqsədi şəhərin bütün ərazilərini dayanıqlı içməli su ilə təmin etməkdir:
“Bəzi ərazilərdə şəbəkədən kənar qeyri-qanuni şəkildə sudan istifadə edilir. 12-14 saat fasiləsiz içməli su ilə təmin olunan ərazilərdə bunu 10-12 saata endirəcəyik. İkincisi isə, gecə saatlarında anbar ehtiyatlarından şəbəkəyə verilən suyun həcmini azaldacağıq. Gecə saatlarında yalnız şəhərətrafı qəsəbələrdə yox, mərkəz rayonlarda da suyun təzyiqi azaldıla bilər”.
Anar Cəbrayıllı qeyd edib ki, qrafiklərdə tənzimləmələr aparılmasa, mənbədən götürülən suyun azaldılması ərazilər üzrə qeyri-bərabər su təchizatına səbəb ola bilər:
“Bəzi yaşayış məntəqələrində sakinlər 24 saat içməli su ilə təmin edildikləri halda, bəzilərində isə ümumiyətlə su problemi yaşana bilər. Şəhərin mərkəz rayonlarında – Nərimanov, Nizami, Səbail, Nəsimi, Yasamal və s. yenə də içməli su təchizatı 24 saat davam edəcək. Zığ, Hövsan, Sabunçu, Keşlə, kənd Əhmədli və s.yerlərdə isə, xüsusən də, suyun qanunsuz şəkildə istifadə olunduğu ərazilərdə qrafikli rejimlər tətbiq olunacaq”.
Məsələ ilə bağlı Azərbaycan Ekologiya Standartlarının Monitorinq Fondunun prezidenti, biologiya elmləri doktoru, professor Rauf Sultanov Ednews-a açıqlmasında qeyd edib ki, inkişaf etmiş ölkələrlə müqayisədə Azərbaycanda adambaşına düşən içməli su sərfiyyatı 4-5 dəfə çoxdur:
“Azərbaycanda şirin suların 2/3 hissəsi sərhəd dövlətlərin hesabına ödənilir. Ölkədə içməli suların istifadəsinə dövlət və aidiyyatı qurumlar tərəfindən ciddi nəzarət edilməlidir. Külli-miqdarda vəsait ayrılaraq Bakıya artezian suları çəkildi. Lakin su ehtiyatlarının nəzarətsiz istifadəsi qıtlığa səbəb olur. Həyət evlərində şəbəkədən kənar su xətti çəkib istədikləri qədər sərf edirlər, maşınyuma yerlərində şirin sudan istifadə edirlər, kimyəvi maddələr isə suyu çirkləndirir. Şirin su təkrar istifadəyə yararlı olmalıdır, lakin belə olan halda kimyəvi qatqılı sudan təkrar istifadə mümkünsüz hala gəlir. Şəhərin mərkəzində su o qədər təzyiqlə gəlir ki, yay aylarında sakinlər dəfələrlə su kranlarını dəyişməli olur. İçməli suyun verilmə qrafikində dəyişiklik edilməsi vacib addımdır. Hər istifadədə biz 4 dəfə artıq su israf edirik. Təzyiq azaldılmalıdır. İctimai yerlərdə sudan istifadəyə nəzarət gücləndirilməlidir. Qanunsuz və boşuna su sərf edənlərə qarşı cəza tədbirləri görülməlidir. Suyun hər litri puldur. Artezian sularını biz bu gün istifadə etməməliyik. Su qıtlığı ehtimalını nəzərə alıb gələcək üçün saxlamalıyıq. Dünya təcrübəsində də bu belədir. Lakin biz indidən bu yeraltı suların istifadəsinə başlamışıq. Əgər yeraltı sular istifadə olunarsa, ərazi landşaftı, bitki örtüyü, ümumilikdə ekologiya məhv olar. Bu da suyun buxarlanması prosesini gücləndirir”.
Törə Zeynallı
