“Zəfər Günü”nə həsr edilmiş “Qəhrəmanlıq salnaməsi” kitabının təqdimatı keçirilib.
Ednews xəbər verir ki, “LIBRAFF” kitab evində baş tutmuş tədbirdə Milli İrsi Mədəni Tarixi Araşdırmalar (MİMTA) Fondu və “Füyuzat” dərgisinin 8 Noyabr “Zəfər Günü” münasibətilə təşkil etdiyi “Qəhrəmanlıq salnaməsi” adlı yazı müsabiqəsinin məqalələr toplusu ictimaiyyətə təqdim edilib.
Tədbirdə MİMTA Fondunun icraçı direktoru Pərviz Əmirov, “Füyuzat” jurnalının baş redaktoru Mübariz Yunus, MİMTA Yayımlarının direktoru Əsəd Aslanoğlu və digər ictimai xadimlər, ziyalılar, müsabiqə iştirakçıları, həmçinin, şəhid ailələri, qazilər, media nümayəndələri və oxucular iştirak edib.
Kitabda 44 günlük Vətən müharibəsində tarix yazmış şəhid və qazilərimizin, ön və arxa cəbhədə mübarizə aparan qəhrəmanlarımızın şücaətlərini əks etdirən yazılar toplanıb.
Təqdimatda çıxış edən MİMTA Fondunun icraçı direktoru Pərviz Əmirov bildirib ki, Fond fəaliyyət göstərdiyi 17 ildən artıq müddət ərzində vətənpərvərliyi, milli ideyaları təbliğ edən çoxsaylı müsabiqələr təşkil edib. “Qəhrəmanlıq salnaməsi” yazı müsabiqəsi digərlərindən xüsusilə fərqlənir. Çünki o, şəhid və qazilərimizin bizə əmanət etdiyi parlaq zəfərdən bəhs edir. P.Əmirov qeyd edib ki, belə tədbirlərin keçirilməsi şəhid və qazilərimizə ehtiramın nümunəsidir və gənc nəsilə Vətən sevgisi, fədakarlıq ruhunun aşılanması baxımından təqdirəlayiqdir.
MİMTA Yayımlarının direktoru Əsəd Aslanoğlu Ednews-a müsabiqənin keçirilmə şərtləri və ümumi ideyası haqqında məlumat verib. O bildirib ki, müsabiqəyə qəbul edilən 237 yazıdan 87-i kitabda yer alıb:
“Müsabiqəyə təqdim edilən məqalələr münsiflər heyəti tərəfindən anonim şəkildə obyektiv qiymətləndirilib. 3 əsas qalibə pul mükafatı, 3 nəfərə isə həvəsləndirici mükafatlar təqdim edilib. Sevindirici haldır ki, müsabiqəyə bölgələrdən də iştirakçılar qatılıb. Düşünürəm ki, qələbəmizə və qəhrəmanlarımıza həsr edilmiş belə müsabiqələrin təşkili və kitabların nəşr edilməsi şəhid və qazilərimizin əziz xatirəsinin əbədiləşməsinə xidmət edəcək”.
Törə Zeynallı