Siyasi partiyalar haqqında qəbul edilən yeni qanuna əlavə edilən əsas məqamlardan biri partiyanın qeydiyyatı üçün üzv sayının 1000 nəfərdən azı 5 min üzvə artırılması siyasi arenada varlığını davam etdirmək istəyən kiçik partiyaların digərləri ilə birləşməsinə, ya da fəaliyyətlərini tamamilə dayandıracağı gözlənilir.
Artıq Azərbaycan Naminə Alyans Partiyası ləğv olunmaq barədə qərar qəbul edib. Bu barədə partiya xüsusi Bəyanat yayıb.
ANAP sədri Abutalıb Səmədov bundan sonra fəaliyyətini müstəqil siyasətçi – siyasi ekspert kimi davam etdirəcəyi vurğulanıb.
Azərbaycanda dövlət qeydiyyatına alınmış 58 siyasi partiya mövcuddur. Vətəndaşlar bu partiyaların demək olar ki, yarısını tanımır. Buna səbəb də partiyaların aktiv üzvünün çox az olmasıdır. Partiyaların əksəriyyəti hətta Mərkəzi Seçki Komissiyasına illik maliyyə hesabatını da təqdim etmir.
Azərbaycanda bundan sonra partiyalarla bağlı hansı dəyişikliklər ola biləcəyini elə partiya sədrlərindən soruşduq.
Gələcək Azərbaycan Partiyasının sədri Ağasif Şakiroğlunun sözlərinə görə, yeni qanunun tələblərinə cavab verməyən partiyalar tarixin arxivinə gedəcək:
“Azərbaycan Naminə Alyans Partiyasının qərarına hörmətlə yanaşıram. Bu hər bir partiyanın müstəsna hüququdur və onun daxili işidir. Bu tip qərarları partiyanın qurultayı qəbul edir. Artıq şərh vermək doğru deyil bu bir partiyanın daxili işidir. Hesab edirəm ki, doğru qərar veriblər. Hər halda hər bir partiya potensiyalına uyğun qərarlar qəbul edir.
Bundan sonra analoji halların baş verəcəyi ilə bağlı dəqiq bir fikir demək çətindir. Hər halda yeni qanunun tələblərinə cavab verməyən siyasi partiyaların siyasi arenada qalmayacağı qanun qüvvəyə minəndən bəlli idi. Azərbaycan strukturlaşmış, sosial bazası olmayan siyasi partiyaların tarixin arxivinə getməsilə nəticələnəcək. Böyük odur ki, potensiyalını doğru qiymətləndirərək qərarlar qəbul etməkdir. Daha cığalçılıq etməmək, saxta imzalar tərtib edib dövlət qurumlarına göndərməmək, “ay məni qeydiyyata almadılar” kimi haray-həşir salmadan zəruri qərarlar qəbul etməkdir”.
Ağ Partiyanın sədri Tural Abbaslının fikrincə çoxluq yaratmaq yerinə, bəzi partiyalar da bu qərarı verməlidir:
“Düşünürəm ki, bunlar təbii haldır və baş verməlidir. Qanun qəbul olunandan sonra oradakı öhdəliklər ağırdır. Müsahibə verəndə deyilən rəqəmlərə fikir verməyin. “Ay mənim 50 min, 100 min üzvüm var”. Artıq 22 ildir ki, partiya işi ilə məşğulam. Mən bilirəm ki, deyilən rəqəmlərin nə qədər ağır məsələlərdir. Əminəm ki, beş min real üzvlə bağlı doğrudan yoxlamalar aparsalar Azərbaycanda 5-6 partiya fəaliyyətini davam etdirə bilər. Qalanları bu rəqəmi düzəldəcək gücdə və ehtimatda deyil. Mən Abutalıb müəllimi də alqışlayıram. Adam etiraf edir ki,bu fəaliyyət ağır olar bizə ona görə biz fəaliyyətimizi dayandırırıq.
Məsləhət görərdim ki, digərləri də arada yalandan çoxluq yaradıb fikir dağıtmaqdansa elə qərar verib özlərini buraxsınlar. Ortada onsuz 3-5 partiya var. Biz də bilək ki, sözün əsl mənasında ortada partiya var. Xalq da deyir ki, 70 partiya var. Deyə bilmirsən ki, qardaş o qədər partiya yoxdur. Gözləyirəm ki, qanunun qəbulundan sonra partiyaların yarısı bu və ya digər formada fəaliyyətini dayandıracaq”.
Xatırladaq ki, 2021-ci ildə Yeni Azərbaycan Partiyasına (YAP) VII qurultayında Azərbaycanda fəaliyyət göstərən 6 siyasi partiyanın YAP-a qoşulması ilə bağlı qərar qəbul edilib. YAP-a birləşən partiyalar aşağıdakılardır: Azərbaycan Xalq Demokratik Partiyası, Azərbaycan Kəndli Partiyası, Milli Qurtuluş Partiyası, Azərbaycan Yurddaş Partiyası, Azərbaycan Milli Hərəkat Partiyası, Azərbaycan Demokratik Sahibkarlar Partiyası.
Əbülfət Baxşəli