Bakıda hər il yararsız hesab edilən, eyni zamanda müxtəlif iqtisadi layihələrin reallaşdırılması məqsədilə bina və obyektlərin söküntüsü aparılır. Onların əvəzində ya parklar, ya yeni yollar, ya da çoxmərtəbəli binalar tikilir.
Zamanla insanlar tərəfindən bununla bağlı şikayətlər səslənir. Sökülən evlərdən çıxmaq istəməyən, verilən təzminatla razılaşmayan sakinlərin narazılıqları olur.
Maraqlıdır, ümumiyyətlə sökülən evlərə və obyektlərə təzminat necə hesablanmalıdır?
Məsələ ilə bağlı Ednews-a danışan hüquqşünaş Əsabəli Mustafayev bildirib ki, hər ərazidə qiymətləndirmə komissiyası var. Onun sözlərinə görə, sakinlər qiymətləndirmə üçün özləri bu komissiyaya müraciət edə bilərlər.
“Biz ev sahiblərinə həmişə məsləhət vermişik ki, onlar özləri də qiymətləndirməni aparan təşkilatlara müraciət etsinlər. Onlar bu təşkilatlar vasitəsilə dəqiq qiyməti öyrənə bilərlər”.
Ə.Mustafayev həmçinin qeyd edib ki, hər hansı bir yanlışlıq olarsa şikayətçilər məhkəməyə də müraciət edə bilərlər.
“Məhkəmə də bu MMC-lərin qiymətləndirməsini qəbul etməsə vətəndaş Avropa məhkəməsinə müraciət edə bilər. Bununla bağlı Avropa məhkəməsinə çoxsaylı şikayətlər olunub. Nəticəsi də müsbət olub. Cəzanın tətbiq olunması məsələsinə gəldikdə bu çox çətin prossesdir”.
Hüquqşünas onu da bildirib ki, bunun üçün ilk növbədə sübut lazımdır.
“Avropa məhkəməsi yalnız maddi ziyan kimi burada cəza tətbiq edə bilər”.
Tikinti üzrə ekspert Elnur Fərzəliyevin sözlərinə görə isə söküntü işləri iki yolla aparılır. Ekspert bildirib ki, yol ərazi qəzalıdırsa, tikinti şirkətləri əvəzində yeni binalar tikmlidir.
“Mənzili sökülən şəxslərə ya kompensasiya ödənilir, ya da evi başqa bir mənzillə dəyişdirilir. İkinci hadisə nadir hallarda baş verdiyindən tikinti şirkətləri daha çox vətəndaşlara kompensasiya ödəməyə üstünlük verirlər. Bəzən isə kompensasiya məbləği MTK-larla ev sahibləri arasında narazılıq yaradır”.
E.Fərzəliyev onu da qeyd edib ki, bu ərazilərdə yaşayan insanlara təqribi 20 % artıq kvadratmetr ilə mənzil verirlər.
“Bəzi ərazilər var ki, bura dövlət əhəmiyyətli ərazi olduğu üçün həmin vətəndaşlara müəyyən pul qarşılığında kompensasiya edirlər. Ərazidən asılı olaraq hər kvadrata görə 2-3 min manat ödəyə bilirlər. Ərazi üzrə rəsmi qiymətləndirmə olmalıdır. Bu da mümkün olmur, çünki əmlakların qiymətində bahalaşma olur. Ödənilən pul bəzən vətəndaşın ev alması üçün kifayət etmir. Ödənilən kompensasiya elə olmalıdır ki bu həm də vətəndaşı da razı sala bilsin”.
Ayan Rzayeva
