Gürcüstanda və İranda soydaşlarımızın illərdir ki, həll olunmayan ana dilində təhsil problemi hələ də gündəmdədir. Dövlət olaraq varlığı üçün göstərdikləri fədakarlığa baxmayaraq, Azərbaycan türklərinin adi milli hüququ belə təmin olunmayıb.
“Belə hadisələrin gündəmdə olmağı onu göstərir ki, sözügedən ölkələrdə insan hüquqları pozulur. Həmin dövlətlər hüquqi dövlət deyil. Ana dilində danışmaq, təhsil almaq onu göstərir ki , burada insan haqlarına sayğı göstərilir”.
Bu sözləri Azəri Türk Qadınlar Birliyinin sədri Tənzilə Rüstəmxanlı Ednews-a açıqlamasında bildirib.
Onun sözlərinə görə artıq uzun illərdir ki, İranda soydaşlarımıza qarşı bu münasibət var.
“Bu ciddi məsələdir. Onlar nəinki təhsil almaq, heç övladlarına türk adı verə bilmirlər. Uzun illərdir ki, Azərbaycanın müxtəlif elm adamları soydaşlarımızın ana dili problemi məsələsi üzrə mübarizə aparıblar. Neçə adamlar var ki, onlar İranın zülmündən qaçıb Avropa ölkələrində yaşayırlar. Biz illərdir ki, Dünya azərbaycanlılarının konqresinin tərkibində Iranın soydaşlarımıza qarşı etdiyi haqsızlığı gündəmdə saxlamışıq. Əlbəttə ki, prezident İlham Əliyev özü də bildirdi ki, bu insan haqqlarının tapdalanması deməkdir”.
T. Rüstəmxanlı qeyd edib ki, balaca ölkə olmağımıza rəğmən tolerant dövlət kimi ölkəmizdə rus dilli məktəblər fəaliyyət göstərir.
“Bu gün təşkilatlar dünya dövlətlərini insan haqlarına hörmətə çağırırlar. Amma təəssüf ki, dilimizə qarşı hələ də belə yanaşmalar var.Gürcüstan da eyni məsələyə ciddi yanaşmalıdır. Azərbaycan heç zaman Gürcüstanın parçalanmasını istəməyib. Əgər Gürcüstan bu gün Qafqazda mövcuddursa, bu Azərbaycan və Türkiyənin hesabınadır. Güney azərbaycanlılara bir dayaqdır. Bu onlara gələcək taleləri ilə bağlı ümid verir. Bu, Iran və Gürcüstan rəsmilərini də dərindən düşündürməlidir”.
O son olaraq onu da qeyd edib ki, İran dünyaya bağıraraq insan haqlarından, azadlıqdan danışsa da, milyonlarla insanı öz dilində təhsil almaqdan məhrum edir.
“Bu birmənalı olaraq insan hüquqlarının tapdalanması deməkdir”.
Ayan Rzayeva
